Ньурбаҕа «Саха сирэ – Дьоруойдар сирдэрэ» бырагыраама курсаана «КөмүсКэл» сыах үбүлүөйүгэр кытынна

Бу күннэргэ «Саха сирэ – Дьоруойдар сирдэрэ» бырагыраама курсаана Валерий Петров Ньурбаҕа «КөмүсКэл» сыах тэриллибитэ үөрүүлээх үс сыллааҕы үлэтин үбүлүөйүгэр кытынна.
Тэрээһиҥҥэ оройуон дьаһалтатын бэрэстэбиитэллэрэ, оройуон Сэбиэтин бэрэссэдээтэлэ Нюргуяна Михайлова, оройуон баһылыгын бастакы солбуйааччыта Василий Семенов уонна куорат баһылыга Геннадий Игнатьев кытыннылар. Кинилэр байыастары өйүүр сыах туохха да сыаналаммат үлэтин, оройуон уопсастыбаннай олоҕор көхтөөх кыттыытын бэлиэтээтилэр. «Саха сирэ – Дьоруойдар сирдэрэ» бырагыраама кыттылаахтарын уонна байыастар ааттарыттан эҕэрдэ тылы Валерий Петров эттэ.
«Ис сүрэхпиттэн байыастарга өйөбүлгүт, туохха да сыаналаммат кылааккыт иһин махтанабын! Эһиги биир дойдулаахтарбытыгар анаан бэлэмниир гуманитарнай көмөҕүт олус сыаналаах», — диэн кини иһитиннэрдэ. Тэрээһин кэмигэр «КөмүсКэл» сыахха улуус баһылыгыттан Махтал сурук уонна «Нитка» маҕаһыынтан табаары атыылаһыыга 50 тыһ.солк. суумалаах сэртипикээт туттарылынна. Ону таһынан сыахха мэлдьи көмөнү оҥорор урбанньыттар, уопсастыбаннай тэрилтэлэр Махтал суруктарынан бэлиэтэннилэр.
«Саха сирэ – Дьоруойдар сирдэрэ» бырагыраама Айсен Николаев көҕүлээһининэн олоххо киирэр уонна муниципальнай, судаарыстыбаннай уорганнар салайар каадырдарын резервэтин оҥорууга туһуланар. Бырагыраама дойду Бэрэсидьиэнэ Владимир Путин көҕүлээбит «Время Героев» федеральнай бырайыагар тэҥнээх.
Сообщить об опечатке
Текст, который будет отправлен нашим редакторам: