«Саха сирэ – Дьоруойдар сирдэрэ» бырагыраама курсааннара стажировкаларын түмүктээтилэр

Атырдьах ыйын 6 күнүгэр «Саха сирэ – Дьоруойдар сирдэрэ» эрэгийиэннээҕи каадыр бырагырааматын кыттааччыларын өрөспүүбүлүкэ судаарыстыбаннай былааһын уорганнарыгар стажировкаларын түмүгүнэн отчуоттуур кэмпириэнсийэтэ ыытылынна.

Курсааннар үлэлэрин туһунан отчуоттарын билиһиннэрдилэр, ону таһынан судаарыстыбаннай структуралар үлэлэрин-хамнаастарын тупсарыыга туһуламмыт бырайыактарынан үллэһиннилэр. СӨ Ил Дарханын уонна бырабыыталыстыбатын дьаһалтатын салайааччыта Георгий Михайлов «Саха сирэ – Дьоруойдар сирдэрэ» бырагыраамата «Дьоруойдар кэмнэрэ» федеральнай бырайыак чэрчитинэн каадыр бырагыраамаларын олоххо киллэрии тэтиминэн дойду атын эрэгийиэннэрин инники күөҥҥэ сылдьарын бэлиэтээтэ. Ону сэргэ кини курсааннарга ситиһиллибиккэ тохтообокко, куруук үөрэнэ-сайда сылдьалларыгар баҕарда.

Курсааннары СӨ Ил Дарханын иһинэн Инновационнай менеджмент үрдүкү оскуолатын ректора Василий Миронов салайааччылаах куонкурус хамыыһыйата сыаналаата.

«Бүгүн биһиги дьоҕурдаах уонна кэскиллээх салайааччылар үлэлэрин бастакы түмүктэрин көрдүбүт. Кинилэр стажировка кэмигэр бэйэлэрин эрэ көрдөрбөккө, судаарыстыбаннай салайыы көдьүүһүн үрдэтэргэ чопчу быһаарыылары киллэрдилэр. Каадыр бырагырааматын түмүктэммит кэрдиис кэмнэрэ эрэгийиэн таһымнаах салайыыны хаптылар, инникитин – муниципальнай таһым уонна судаарыстыбаннай тэрилтэлэринэ салайыы. Онон, «Саха сирэ – Дьоруойдар сирдэрэ» бырагыраамата –  байыаннай дьайыы кыттыылаахтарыгар бэйэлэрин кыахтарын арыйарга уонна өрөспүүбүлүкэ сайдыытыгар араас хайысхаларынан кылааттарын киллэрэргэ ураты кыах буолар.

Биһиги сүрүн сорукпут – кинилэргэ Саха сирин уонна Бүтүн дойду туһугар ситиһиилээхтик үлэлииллэригэр бары наадалаах билиини-көрүүнү уонна сатабыллары биэрии буолар», – диэн кини эттэ.

Санатан эттэххэ, Ил Дархан Айсен Николаев көҕүлээһининэн олоххо киирбит «Саха сирэ – Дьоруойдар сирдэрэ» эрэгийиэннээҕи каадыр бырагыраамата, РФ Бэрэсидьиэнэ Владимир Путин сорудаҕынан олоххо киллэриллэр «Дьоруойдар кэмнэрэ» федеральнай бырагыраама аналога буолар.