«Саха сирэ – Дьоруойдар сирдэрэ» бырагыраама кыттыылааҕа санаатын кытта үллэһиннэ

«Теплоэнергия» АУ сүрүн инженера, «Саха сирэ – дьоруойдар сирдэрэ» бырагыраама кыттыылааҕа Гаврил Наумов СӨ Сыана бэлиитикэтигэр судаарыстыбаннай кэмитиэтин үлэтин кытта билистэ. Ону таһынан, кини  ОДьКХ уонна энергетикаҕа министиэристибэтин үлэтин сүрүн хайысхаларын үөрэппит, салаа бастыҥ тэрилтэлэригэр сылдьыбыт.

Холобур, кинини Дьокуускайдааҕы «Водоканал» хампаанньа үлэтин-хамнаһын далааһына сөхтөрбүт.

«Наһаа интэриэһинэй эбит. Салайыы систиэмэтин, этэргэ дылы, араас идиэйэлэр, көҕүлээһиннэр тустарынан элбэҕи билбэт эбиппин. Стажировка кэмигэр командировкаларга сырыттыбыт, дьону кытта көрсөн билистибит. Бэйэбэр олус элбэх саҥаны биллим», – диэн Гаврил Наумов кэпсээтэ.

«Дьоруойдар кэмнэрэ» федеральнай бэрэсидьиэн бырайыагын курдук, «Саха сирэ – дьоруойдар сирдэрэ» каадыр бырагыраамата байыаннай дьайыы кыттыылаахтарын салгыы судаарыстыбаннай былаас уорганнарыгар, муниципалитеттарга уонна тэрилтэлэргэ салайар дуоһунастарга үлэлииргэ сыаллаах-соруктаах бэлэмниир.