“Саха сирэ – дьоруойдар сирдэрэ” каадыры бэлэмнээһин бырагырааматын иккис түһүмэҕэ саҕаланна

Бүгүн, атырдьах ыйын 8 күнүттэн, “Саха сирэ – дьоруойдар сирдэрэ” өрөспүүбүлүкэтээҕи байыаннай дьайыы кыттыылаахтарыттан каадыры бэлэмнээһин бырагырааматын чэрчитинэн үөрэхтээһин иккис түһүмэҕэ саҕаланна.

Үөрэх бастакы сиэссийэтэ бэс ыйын 16 күнүттэн саҕаламмыта. Онно 25 курсаан ситэриилээх былаас уорганнарын үлэлэрин кытта министиэристибэлэринэн уонна биэдэмистибэлэринэн сылдьан билсибиттэрэ. Бастакы түһүмэҕи ситиһиилээхтик ааһан баран, бүгүҥҥүттэн иккис модуль-үөрэх саҕаланна.

СӨ Аҕа баһылыгын иһинэн үлэлиир инновационнай менеджмент ректора Үрдүкү оскуолатын Василий Миронов  курсааннарга туһаайан “иккис модуль-үөрэхтээһин  эһиги этиилэргитин учуоттаан ыытыллыаҕа. Ол курдук, олохтоох салайыныы систиэмэтин, муниципальнай тэриллиилэр үп-харчы өттүнэн туруктаах буолууларын, социальнай бэлиитикэни уонна территориальнай сайдыы бастыҥ үөрүйэхтэрин туһунан бу салааҕа анаан бүгүҥҥү күҥҥэ үлэлии сылдьар улуус баһылыктарыттан саҕалаан, олохтоох салайыныы эйгэтигэр үлэлии сылдьар салайааччылары эспиэрдэр быһыытынан кэлэн лиэксийэлэри ааҕыахтара, санаа атастаһыахтара. Эһиги көрдөһүүгүтүн учуоттаан, дьон уйулҕатын кытта үлэлэһэр уопуттаах психологтар анал үөрэҕи ыытыахтара. Онон үөрэх ис хоһооно наар лиэксийэ эрэ буолбакка, араас пуорманан барыахтара”, диэн үөрэх иккис түһүмэҕэ аһыллыытыгар эттэ.

“Саха сирэ – дьоруойдар сирдэрэ” өрөспүүбүлүкэтээҕи байыаннай дьайыы кыттыылаахтарыттан таҥыллыбыт үөрэх иккис түһүмэҕин аһыллыытыгар Ил Түмэн дьокутааттара, Ыччат миинистирэ Петр Шамаев, уопсастыбаннай диэйэтэллэр кыттыыны ыллылар.