«Саха сирэ – дьоруойдары сирдэрэ» бырагыраама кыттааччыларыгар психологическай сэминээр ыытыллыаҕа

Анал байыаннай дьайыы бэтэрээннэригэр аналлаах «Лидеры перемен» психологическай сэминээр модуллара «Саха сирэ – дьоруойдар сирдэрэ» каадыр бырагыраамматын үөрэтэр блогун састаабыгар киирдилэр. Бу туһунан бэс ыйын 20 күнүгэр брифиҥҥэ Өрөспүүбүлүкэтээҕи психологическай Киин дириэктэрэ Владимир Скрябин иһитиннэрдэ.

«Курсаннар билиҥҥи кэмҥэ буола турар социальнай уларыйыыларга-тэлэрийиилэргэ, уларыйыылары салайыыга сыһыаннаах матырыйааллары уонна анал байыаннай дьайыы кыттыылаахтарын өрөспүүбүлүкэни салайыы бырасыаһыгар кытыннаран, судаарыстыбаны салайыы саҥа култууратын туругурдарыгар наадалаах социальнай психология атын уратыларын ылыахтара», – диэн киин дириэктэрэ эттэ.

Киин дириэктэрэ иһитиннэрбитинэн, бэс ыйын бастакы аҥаарыгар өрөспүүбүлүкэ үрдүнэн уонна Ростов-на-Дону куоракка баар госпиталь хайысхатынан 500-чэ сайабылыанньа көрүллүбүт, толору арыаллааһын чэрчитинэн консультациялары киллэрэн туран, 600 биирдиилээн уонна бөлөҕүнэн ыытыллар психологическай үлэ көрүҥэ оҥоһуллубут.

Саха сирин психологтарыттан көмөнү уонна өйөбүлү ыларга үлэ чааһыгар 8 (4112) 31-91-09 нүөмэринэн суруттарыахха сөп. Ону таһынан, суукканы быһа үлэлиир итэҕэл төлөпүөнэ 8 800 100-35-50 эбэтэр 122 (онтон 6 уонна 2) үлэлиир.