«Саха сирэ эйигин кытта» ыстаапка ыҥыраллар

«Саха сирэ эйигин кытта» өрөспүүбүлүкэтээҕи уопсастыбаннай хамсааһыҥҥа баҕа өттүнэн, ис саналаарыттан кыттыан баҕарааччылар Дьокуускайга баар ыстаапка кэлэн көмө оҥороллор.

Билигин ыстаап үлэтэ кэҥээтэ, таҥаһы, олоххо-дьаһахха туттуллар маллары ылаллар. Иистэнэр сыахха байыаннай дьайыы кыттыылаахтарыгар таҥастары тигэллэр.

Киин куоракка ыстаапка күн ахсын үлэлиир волонтер Ньургуйаана Готовцева Нам улууһуттан Хамаҕаттаттан киирэн көмө оҥорбуттарын туһунан кэпсээтэ:

— Дьокуускай куоракка баар байыаннай дьайыы волонтердарын «Саха сирэ эйигин кытта» ыстаака Хамаҕаттаттан «Кэрэ умсулҕана» иистэнньэҥнэр түмсүүлэриттэн кэлэн көмөлөһөн барбыттара. Кинилэр балаакка тиктилэр, харысхал уонна «Шаман» диэн көстүүмҥэ таҥас кырыйан бэлэмнээтилэр, маскировочнай сиэккэ баайдылар. Барыларыгар барҕа махтал! Өссө да кэлэн Кыайыы туһугар биир дойдулаахтарым көмөлөһүөхтэрэ диэн эрэнэ хаалабын.

Биһиги аадырыспыт: Дьокуускай к., Бестужев-Марлинскай уул., 5  дь. 1 куорпус.

Мария Винокурова