Саха сирэ Гавриил Иосифович Чиряев төрөөбүтэ 100 сааһыгар бэлэмнэнэр

Быйыл Саха сирэ уһулуччулаах судаарыстыбаннай диэйэтэлэ, ССКП Саха сиринээҕи обкомун бастакы сэкирэтээрэ, Ленин уордьанын, Үлэ Кыһыл Знамятын икки уордьанын, Октябрьскай революция уордьанын кавалердара Гавриил Иосифович Чиряев төрөөбүтэ 100 сылын бэлиэтиир.

«Гавриил Иосифович сырдык кэриэһин үйэтитэргэ өрөспүүбүлүкэҕэ улахан хамсааһыннар олоххо киириэхтэрэ. Олор истэригэр кинигэ таһаарыыта, “Саха” НКИК көрдөрүүтүгэр документальнай киинэ уонна тэлэбиидэнньэ биэриилэрин оҥоруу, Чиряев олоҕун туһунан испэктээкили туруоруу, түмэллэргэ, ол иһигэр “Россия – моя история” түмэлгэ быыстапкалары тэрийии. Оскуолаларга лиэксийэлэр, аһаҕас уруоктар уонна “100 үтүө дьыала” аахсыйа былааннанар. Гавриил Иосифович чиэһигэр Чульман бөһүөлэгэр Нерюнгри куорат аэропордугар аатын иҥэрии сабаҕаланар”, — диэн эттэ үбүлүөйдээх тэрээһиннэри ыытар уонна бэлэмниир хамыыһыйа салайааччыта, өрөспүүбүлүкэ бырабыыталыстыбатын бэрэссэдээтэлин солбуйааччы Анатолий Семенов.

Ураты болҕомто Бүлүү улууһугар буолар тэрээһиннэргэ ууруллуо. Үбүлүөй чэрчитинэн бу улууска материальнай-техническэй базаны бөҕөргөтөр, онно доруобуйа харыстабылын, үөрэх, култуура эбийиэктэрин уонна суоллары тутууну киллэрэн туран, кэккэ тэрээһиннэр ыытыллыахтара. Саамай улахан бырайыагынан Бүлүү куоратыгар Г.И. Чиряев аатын сүгэр 990 миэстэлээх саҥа оскуоланы тутуу буолуоҕа.

Муус устарга Чиряев 100 сылыгар аналлаах үөрүүлээх уопсастыбаннас мунньаҕа, бэс ыйыгар кини чиэһигэр Ыһыах ыытыллыаҕа. Анатолий Семенов Гавриил Иосифович бииргэ үлэлээбит дьонун – Бүлүү улууһун бастакы баһылыгын Юрий Михайловы уонна экономическай билим дуоктарын, профессор Анатолий Поповы кытта көрсүбүтүн бэлиэтээтэ. Анатолий Попов Чиряев өрөспүүбүлүкэ бырамыысыланнаһын, тыатын хаһаайыстыбатын уонна экэниэмикэтин сайдыытыгар киллэрбит кылаатын туһунан киэҥ ыстатыйаны бэлэмнээбитэ сотору киэҥ эйгэҕэ тахсыаҕа.

«Гавриил Иосифович тыа хаһаайыстыбатынан дьарыктанар Саха сирин дойду биир сүрүн бырамыысыланнай киинигэр кубулуппута. Кини олоҕо төрөөбүт өрөспүүбүлүкэтигэр бэриниилээхтик сулууспалааһын чаҕылхай холобура буолар. Биһиги кини 100 сыллаах үбүлүөйүн чиэстээхтик бэлиэтиир уонна эрэгийиэммит сайдыытыгар киллэрбит сүҥкэн кылаатын үйэтитэр эбээһинэстээхпит», — диэн тоһоҕолоон эттэ Анатолий Семенов, диэн иһитиннэрэр Ил Дархан, бырабыыталыстыба пресс-сулууспата.