Саха сирэ Гражданскай пуорумҥа бэлэмнэнэр

Быйыл балаҕан ыйын 9-10 күннэригэр Дьокуускайга Саха сирин гражданскай уопсастыбатын институттарын сүрүн тэрээһинэ – «Гражданскай уопсастыба: Кыайыы туһугар түмсүү» Гражданскай пуорум буолуоҕа.

Тэрээһин Аҕа дойду Улуу сэриитигэр Кыайыы 80 сылыгар, Арассыыйаҕа Аҕа дойдуну көмүскээччилэр сылыгар уонна Саха сиригэр Ийэ дойду көмүскээччилэр сылыгар ананан ыытыллыаҕа. Бу туһунан атырдьах ыйын 27 күнүгэр «Якутия 24» телеханаал «Актуальное интервью» биэриитин эпииригэр Ыччат дьыалаларыгар уонна социальнай коммуникацияларга миниистири солбуйааччы Александр Максимов иһитиннэрдэ.

«Быйыл биһиги Кыайыы 80 сылын бэлиэтиибит. РФ Бэрэсидьиэнин Владимир Путин Ыйааҕынан бу сыл дойдуга Аҕа дойдуну көмүскээччилэр сылынан биллэриллибитэ. Биһиги Ил Дархаммыт Айсен Николаев Саха сиригэр Ийэ дойду көмүскээччилэр сылынан биллэрбитэ. Ол иһин Гражданскай пуорум түһүлгэлэригэр Ийэ дойду иннигэр ытык иэскэ, эппиэтинэскэ, хорсун санааҕа уонна киэн туттууга болҕомтону ууруохпут», – диэн Александр Максимов эттэ.

Пуорум чэрчитинэн уопсайа биэс тиэмэлээх түһүлгэ үлэлиэҕэ. «Сүрүн түһүлгэлэртэн биирдэстэринэн байыаннай дьайыы кыттыылаахтарыгар уонна бэтэрээннэригэр, ону таһынан кинилэр дьиэ кэргэттэригэр өйөбүл миэрэлэригэр анаммыт түһүлгэ буолуоҕа. Судаарыстыба уонна гражданскай уопсастыба өттүттэн өйөбүл, кыһамньы, болҕомто тиэмэтэ олус суолталаах», – диэн Александр Максимов бэлиэтээтэ. Александр Максимов бэйэтэ байыаннай дьайыы бэтэрээнэ, иккис БАРС «Боотур»  этэрээттэрин састаабыгар РФ интэриэстэрин байыаннай  дьайыыга ыытыллар сиригэр көмүскээбитэ, «Саха сирэ – Дьоруойдар сирдэрэ» каадыр бырагырааматын кыттыылааҕа буолар.

Пленарнай мунньах «Гражданскай уопсастыба: Кыайыы туһугар түмсүү» тиэмэҕэ ананыаҕа, онно бары дэлэгээссийэлэр кыттыыны ылыахтара. Биэс түһүлгэ үлэтин түмүгүнэн уопсай түмүктэри уонна этиилэри көрдөрөр өрөсөлүүссүйэ ылыллыаҕа.