Саха сирэ ГТО-ҕа Уһук Илин Куубагар кыһыл көмүс уонна боруонса мэтээллэри ылла

Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы Анатолий Семенов өрөспүүбүлүкэ сүүмэрдэммит хамаандатын «ГТО оонньуулара» Уһук Илин IV Куубагар чаҕылхайдык кыттыбытынан эҕэрдэлээтэ.

Күрэхтэһии сүрүн сонунунан Игнат Чомчоев кыттыыта буолла — кини многоборьеҕа иккис сылын субуруччу бастакы миэстэни ылан, чөмпүйүөн аатын чиҥэттэ. Күрэсчит үрдүк таһымнаах физическэй бэлэмнээҕин, успуорка дьулуурун көрдөрдө. Кинини кытта пааранан Руслан Мифтахов кытынна. Бу туһунан sakha.gov.ru иһитиннэрэр.

Саха сирин хамаандата эмиэ үрдүк көрдөрүүнү ситиһэн, Уһук Илин уокурук күүстээх хамаандаларын ортотугар бочуоттаах III миэстэни ылла. Сүүмрэдэммит хамаанда састаабыгар киирдилэр: Рустам Мубараков, Яна Бережецкая, Николай Филиппов, Александра Барашкова, Леонид Зырянов уонна Наталья Радченко.

Ону таһынан, балаҕан ыйын 7 уонна 8 күннэригэр кыттар Саха сирин ыччат хамаандатын «Оскуола үөрэнээччилэрэ» категорияҕа түмүгэ тахсара күүтүллэр. «Бүтүн хамаандабытын ситиһиилээх кыттыыгытынан ис сүрэхпиттэн эҕэрдэлиибин! СӨ ГТО многоборьетын федерациятыгар, СӨ «Кэскил кэлимэ» пуондатыгар, СӨ Инновацияны сайыннарар пуондатыгар, «Саха сирин тимир суоллара» АУо-гар уонна Владивосток куоракка ыытыллыбыт «ГТО оонньуулара» Уһук Илин IV Куубагар биһиги күрэсчиттэрбит кыттыыларын тэрийиигэ кылааттарын киллэрбит бары дьоҥҥо махтанабын», — диэн Анатолий Семенов бэлиэтээтэ.