Бу күннэргэ ситэриилээх былаас отчуоттара түмүктэннилэр. Соторутааҕыта Чурапчы улууһугар ыытыллыбыт отчуокка сылдьыбыт суруналыыс Женни Стрюкова бүгүҥҥү хаһыакка бу ырытыытын сырдатта.
Кини онно дьон санаатын билиһиннэрдэ. Холобур, Чурапчы сэлиэнньэтиттэн Константин Кривошапкин сүөһүлээх киһиэхэ кыһыҥҥы өттүгэр хамнас төлүүр туһунан саҥа сокуон ылылларын туруоруста. Кыстыкка киирэн баран күөххэ үктэниэхтэригэр диэри көрүүгэ төлүөххэ диир. Кини сүөһүлээх киһиэхэ баһаары утары үлэни ыытааччы быһыытынан хамнастыахха диэн киһини толкуйдатар этии оҥордо. Бүгүҥҥү хаһыаты ааҕыҥ уонна сэргээҥ.
Саха киһитэ үксэ уус, иистэнньэҥ, худуоһунньук, туосчут, тимир ууһа. Ол да иһин Саха сирин айар куттаах дьоно Норуот маастарын күнүн тус бэйэтин бырааһынньыгын курдук ылынар. Тэрийээччилэр «бастакы сылларга 200-чэ киһи кыттыбыт буоллаҕына, билигин бары улуустан тыһыынчанан киһи анаан оҥостон, бэлэмнэнэн кэлэр» дииллэр. Бүгүҥҥү хаһыакка бу күннэргэ Норуот маастарын күнүн чэрчитинэн ыытыллыбыт тэрээһиннэр тустарынан сиһилии сырдаттым.
Оҥоһуу өй хаһан эрэ күннээҕи олохпутугар киириэн туһунан урут улаханнык толкуйдаан көрбөт этибит. Ол эрээри, Саха сиригэр аҕыйах сылтан бэттэх сайдан, олох ханнык баҕарар салаатыгар көмөлөһөр кыахтааҕа көһүннэ. Бу күннэргэ “Сахамедиа” холдинг пресс-саалатыгар оҥоһуу өй (искусственный интеллект) олоххо киириитин туһунан киэҥ ыҥырыылаах “төгүрүк остуолтан” матырыйаалы бэчээккэ бэлэмнээтэ суруналыыс Людмила Попова.
“Бастаан тэриллэллэригэр биир хотонноох этилэр, кэтэх ыаллартан сүөһү-ас атыылаһан, үлэлэрин саҕалаабыттара. Онно көмөнү оччотооҕу улуус дьаһалтата уонна СӨ Тыатын хаһаайыстыбатын уонна аска-үөлгэ бэлиитикэтин министиэристибэтэ оҥорбуттара. Оччолорго балтараа мөл. солкуобай курдугу биэрбиттэрэ. Итинтэн тирэхтэнэн, билиҥҥэ диэри үлэлии сылдьаллара хайҕаллаах” диэн “Тыа сирэ” балаһаҕа ким кимнээҕи сырдаппытын бүгүҥҥү бээтинсэтээҕи хаһыаттан билиэххит.
“Аһыы утаҕынан үлүһүйүү эрэгийиэни эрэ буолбакка, бүтүн дойдуну хабар улахан кыһалҕа буолар. Арыгы атыылыыр маҕаһыыннар сокуоннай саастарын ситэ илик оҕолорго атыылаабыт түгэннэрин, оннооҕор лиссиэнсийэтэ суох арыгыны атыылаан хармааннарын хаҥатыммыт тэрилтэлэр туһунан үгүстүк суруйан турабыт. Сокуон хараҕынан аһыы утаҕынан эргинэр маҕаһыыннар оскуолалар, уһуйааннар, дьон-сэргэ олорор элбэх кыбартыыралаах дьиэлэрин тастарыгар суох буолуохтаахтар. Хомойуох иһин, биһиги кыракый куораппытыгар оҕолору сэргэхситэр, оонньотор сирдээҕэр арыгы атыылыыр маҕаһыын, кафе, түүҥҥү кулууп ахсаана быдан элбэх” диэн туран, суруналыыс Ульяна Захарова бу сытыы тиэмэни таарыйда. Ааҕыҥ уонна сэргээҥ.
”Гарааспар уһанар туспа муннуктаахпын. Сүрүннээн сайын уоппускабар уһанабын. Үлэлиир кэммэр бокуой суох. Урукку сылларга биһиэхэ, Чүүйэҕэ, мин эрэ уһанан саҕалаабыт буоллахпына, билигин уһанар дьахтар ахсаана элбээн эрэр. Мин уһанарбын көрө сылдьан, ыалым дьахтар ылсыбыта. Онтон нэһилиэгим дьахталларыгар уһаныыга маастар-кылаас ыыппытым. Кэрэхсэбиллээҕэ баар, кыргыттар сөбүлээн арааһы уһаналлар. Ол курдук, “наличниктан” саҕалаан, умывальникка, харысхал арааһыгар тиийэ оҥоробут. Онон Чүүйэ ыалларын дьиэлэрин таһа бэрт дьэрэкээн ойуулардаах тупсаҕай көстүүлээх нэһилиэк буолан, хараҕы сымнатан эрэр” диэн Чүүйэ оскуолатын учуутала тугу хайдах уһанарын кэпсээбитин бүгүҥҥү “Сатабыл” балаһаттан билиэххит.
“Өрөспүүбүлүкэ Үлэҕэ министиэристибэтэ иһитиннэрбитинэн, быйыл 4 дьиэ кэргэҥҥэ, ол иһигэр элбэх оҕолоох 1 уонна оҕону иитэ ылбыт 3 дьиэ кэргэҥҥэ, массыына атыылаһарыгар биирдэ оҥоһуллар харчынан төлөбүрү биэрии бигэргэтиллибит. Нам улууһуттан төрүттээх элбэх оҕолоох Анастасия Афанасьевна уонна Николай Иннокентьевич Сивцевтэр онус оҕолоро 2024 сыл алтынньытыгар күн сирин көрбүтэ. Бу күннэргэ дьиэ кэргэн УАЗ-фермер массыынаны атыылаһар туһунан дуогабар түһэристэ”, – бу суруналыыс Ангелина Васильева элбэх оҕолоох ыалларга туох көмө оҥоһулларын туһунан ыстатыйатыттан холобурдаатым. Сиһилии аахтаххытына бэрт үгүһү билиэххит.
“Улуустааҕы куонкуруска чыычаахтар тустарынан ыллаабыппын, төһө да кырачаан буолларбын, наһаа өйдүүбүн. Бэйэбин өйдүүр буолуохпуттан, опера ырыаһыта буолуом диэн баҕалаах этим. Аммаҕа “Радуга” уһуйаан муусукаҕа салайааччыта Татьяна Яковлева байааҥҥа дьарыктаан, “бу кыыс академическай куоластаах ырыаһыт буолуо” диэн айахпын сөпкө атарга, тыынарга дьарыктыыра” диэн үс саастааҕар кытта ыллыырын өйдүүр айар үлэһит туһунан суруналыыс Надежда Егорова кэпсэтиитин бүгүҥҥү хаһыакка ааҕыҥ.
“Төһө да учаастак тиийбэт диэн буоллар, быраҕылла сытар сир оннооҕор Дьокуускай ортотугар баар. Оннук учаастактар ордук аттыларыгар олорор дьоҥҥо кутталлаахтар. Сайын аайы отунан саба үүнэн баран, баһаар барар кутталын үөскэтэллэр, бэйдиэ ыттар олохсуйаллар, ааһан иһэр дьон бөхтөрүн быраҕар сирдэригэр кубулуйаллар. Онон бу туһаныллыбакка сытар даача, саад-оҕуруот, уһаайба сирдэрин туһаҕа таһаарар көннөрүү киирбитэ олох наадалаах” бу суруналыыс Антонина Эверстова “Эйиэхэ- туһанааччыга” рубрикаҕа суруйуутуттан холобурдаатым. Ааҕыҥ уонна сэргээҥ.
Үөдүгэй нэһилиэгэр түргэнник ситэр салаанан дьарыктанар дьон ахсаана сыллата эбиллэр. Бүгүн өр сылларга дьиэ көтөрүн…
Профилактическай тэрээһиннэр холбоһуктаах дьаһалларын кэмигэр Өлүөхүмэ оройуонугар ИДьМ учаастактааҕы боломуочунайдара уонна ИДьМ подразделениеларын үлэһиттэрэ арыгы…
Бүгүн, кулун тутар 14 күнүгэр, СӨ Тас сибээстэргэ уонна норуоттар дьыалаларыгар министиэристибэтин кэллиэгийэтин Саха сирин…
ИДьМ 2 №-дээх полициятын дьуһуурунай чааһыгар суотабай төлөпүөнү уорбуттарын туһунан эр киһи сайабылыанньа суруйбут. Эр…
Саха сиригэр анал байыаннай дьайыы кыттыылаахтарын дьоруойдуу быһыыларын үйэтитэр сыаллаах мемориальнай комплекс бырайыагын оҥорууга архитектурнай…
2025 сыл саҕаланыаҕыттан Саха сириттэн 50 массыынаны анал байыаннай дьайыыга тиэртилэр. Тиэхиникэни кытта байыастарга чугас…