“Саха сирэ” хаһыат бүгүн тугу сырдатта?  

Сэтинньи 27 күнүттэн ахсынньы 3 күнүгэр диэри, үгэс буолбут «Кыһын Саха сириттэн саҕаланар» кыһыҥҥы туризм бэстибээлэ буола турар.

Быйылгы бэстибээлгэ 76 араас тэрээһин ыытыллар. Номнуо ааттаах-суоллаах тэрээһиннэр ыытыллар сирдэрэ быйыл уларыйда. Ол курдук, дьон сөбүлээн сылдьар «Строганина» балык кыһыытын бырааһынньыга урукку курдук «Өрөгөй» успуорт уораҕайыгар буолбакка, быйыл Ю.А. Гагарин аатынан култуура уонна аныгы ускуустуба киинигэр буолуоҕа. Кыһыҥҥы таҥас күрэһэ – «Арчы» дьиэтигэр. Ахсынньы 1-кы күнүгэр Ленин болуоссата саҥардылларынан сибээстээн, өрөспүүбүлүкэ Харыйатын уотун күлүмүрдэтии бырааһынньыга   Доҕордоһуу болуоссатыгар Суорун Омоллоон аатынан опера уонна балет тыйаатырын иннигэр ыытыллыаҕа. Салгыы тэрээһин туһунан бүгүҥҥү хаһыакка ааҕыҥ.

Ис бараана аныгылыы “сканди” истиилинэн оҥоһуллубут, олорор дьиэҕэ сылдьар курдук нус-хас, тупсаҕай. Бу маннык үчүгэй көстүүлээх кырдьаҕастар дьиэлэрэ өрөспүүбүлүкэҕэ өссө ханна да суох диэн бэлиэтээн этиэххэ сөп. Манна иистэнэр уонна уһанар мастарыскыайдар, сынньанар хостор, көмпүүтэр кылааһа, доруобуйаны чөлүгэр түһэрэр кэбиниэттэр, о.д.а. барыта баар. Кырдьаҕастар хосторго иккилии буолан олороллор. Хостор гостиница киэҥ-куоҥ нүөмэрин санаталлар. Барыта муус-маҥан, биир истииллээх. Хас биирдии ороҥҥо үлэһити, сиэстэрэни ыҥырар кунуопка баар. Бу күннэргэ аһыллыбыт Намнааҕы кырдьаҕастар уонна инбэлииттэр саҥа дьиэлэрин туһунан суруналыыс  Ангелина Васильева сырдатта.

Кэлэр 2024 сыл сайыныгар, бэс ыйын 25 күнүттэн от ыйын 7 күнүгэр диэри, Саха сиригэр норуоттар икки ардыларынааҕы “Азия оҕолоро” спортивнай сайыҥҥы оонньуулар ахсыс төгүлүн ыытыллыахтара. Маныаха өрөспүүбүлүкэҕэ бэлэмнэнии үлэтэ күөстүү оргуйар: саҥа эбийиэктэр тутуллаллар, спортсменнарбытыгар сүүмэрдиир күрэхтэһиилэр ыытыллаллар, волонтердары талаллар. Туох бэлэмнэнии үлэтэ барарын бүгүҥҥү хаһыакка ааҕыҥ.

“СӨ Бэрэсидьиэнэ Михаил Николаев бэйэтинэн өйөөн тустаах дьаһалы таһаарбыт буолан, тэрилтэбит аатын ааттаатыбыт да, биһиэхэ ханнык да салайааччы аана өрүү аһаҕас буолара. Үлэ хайысхатын торумнуу охсоот, улуустарга тахсааппытын кытта, оҕо ахсаана, докумуона барыта ситэн, биирдэ өйдөөбүппүт, биһиги иннибитигэр болокунуоттарын кыбыммытынан кырачаан эдэр кэрэспэдьиэннэр бу баар буола түһэллэрэ. Билигин оҕону көҥүллэтэр докумуону толоруу уустугуран, сырыы-айан тохтоото. Оччолорго элбэх оҕону мунньан, доруобуйаларын чэбдигирдэн, хастыы да хонукка анаан үөрэтэр, култуурунай тэрээһиннэргэ сынньатар этибит”, — диэн эдэр кэрэспэдьэннэри кытта үлэни тэрийбит “Хотугу сулус” телерадиоакадемия салайааччыта Татьяна Гоголева ахтар. Ааҕыҥ, сэргээҥ.

Сарсыардаттан Дьокуускай куораттааҕы Ф.И. Авдеева аатынан Оҕо айымньытын дыбарыаһыгар оҕолорун сүкпүт, сиэппит, батыһыннарбыт төрөппүт үксээтэ. Манна “Күөрэгэй” эдэр, блогер ийэлэр түмсүүлэрэ иккис түһүлгэлэрин үрдүк таһымнаахтык тэрийэн ыыттылар. Куоракка даҕаны оҕону сахалыы иитиэххэ, сайыннарыахха сөп диэн итэҕэппиттэрин туһунан суруналыыс Людмила Попова сырдатта.

Кэлиҥҥи кэмҥэ араас дойдуларга саха кыргыттара араас идэни баһылаан үлэлии сылдьалларын туһунан социальнай ситимнэртэн үгүстүк ааҕан билэр буоллубут.  Аныгы үйэ диэх курдук, ким стюардесса буолан, аан дойдуну тилийэ көтөр, ким соҕуруу дойду көмпүүтэринэн үлэлиир пуойаһын араас куораттарынан сүүрдэр. Бүгүн “Саха сирэ” хаһыакка Горнай улууһун Бэрдьигэстээҕиттэн төрүттээх, билигин Калининград куоракка олохсуйан олорор Пелагея Егорова ыалдьыттыыр.

Быйылгыттан өрөспүүбүлүкэҕэ Саха сиригэр олорор Норуоттар национальнай култуураларын күнэ бэлиэтэниэҕэ. Бу күн ахсынньы бастакы өрөбүлүгэр бэлиэтэнэр буолуоҕа. Быйыл бу суолталаах күн ахсынньы 3 күнүгэр түбэһэр. Бу маннык бэлиэ күн баар буоларын национальнай-култуурунай түмсүүлэр лиидэрдэрэ, уопсастыбанньыктар быйыл муус устарга Ил Дарханы кытта көрсүһүү кэмигэр туруорсубуттара.  Норуоттар национальнай култуураларын күнүн көрсө бүгүн биһиги биллэр-көстөр үлэлээх кыргыз омук национальнай-култуурунай түмсүүтүн үлэтин сырдатабыт.

“Урукку сылларга илин эҥээр улуустарыгар оһуокай улаханнык тэнийэ илик этэ. Олоҥхо ыһыахтара, дэкээдэлэрэ ыытыллыахтарыттан ыла, олох атын көстүү буолла. Ол курдук, Чурапчы улууһугар түөлбэнэн оһуокай кытта тэнийдэ. Улуус нэһилиэктэрэ араас араастык оһуокайдыыллар. Онон ханнык нэһилиэк киһитэ түһүлгэни иилээн иһэрин тута эндэппэккэ билэҕин”, — дижн соторутааҕыта Ил Дархан истипиэндьийэтин ылбыт Семен Морфунов бүгүҥҥү хаһыакка санаатын үллэһиннэ.

Ынырык быһылаан киһи өллөҕүнэ эрэ киэҥ эйгэҕэ биллэр. Оттон төһөлөөх дьахтар билигин даҕаны кэргэттэриттэн атаҕастана олорорун ким да билбэт. Дьиҥэ Дьокуускайга 2020 сылтан уустук балаһыанньаҕа түбэспит дьахталларга көмөлөһөр приют үлэлиир эбит. Үгүс киһи приют туһунан билбэт. Кыһалҕалаах ийэлэргэ көмөлөһөргө социальнай тэрилтэ туһунан суруналыыс Ульяна Захарова сырдатта. Приют аадырыһа биллэр төрүөтүнэн бэриллибэтэ. Оттон сибээстэһэр төлөпүөнү бүгүҥҥү хаһыаттан булуоххут.