Салгыы
“Саха сирэ” хаһыат Саҥа дьыллааҕы нүөмэригэр тугу суруйда?  

“Саха сирэ” хаһыат Саҥа дьыллааҕы нүөмэригэр тугу суруйда?  

29.12.2022, 12:08
Бөлөххө киир:

“Сахамедиа” холдинг “Саха сирэ” хаһыатын эрэдээксийэтин кэлэктиибэ өрөспүүбүлүкэбит бары олохтоохторун, күндү ааҕааччыларбытын үүнээри турар 2023 сылынан ититиик-истиҥник эҕэрдэлиибит! Эһиилги сыл биһиэхэ барыбытыгар ыраас халлааннаах, чаҕылхай күннээх олоҕу, или-эйэни аҕаллын, бары баҕа санаабыт кэмигэр туолан истин! Бүгүҥҥү чэппиэрдээҕи Саҥа дьыллааҕы хаһыат олус интэриэһинэй, бырааһынньыктыы ис хоһоонноох буолан, санааны көтөҕөр, эрэли үөскэтэр матырыйаалларынан баай.

Ырытыыбын Ил Дархан Айсен Николаев Нам улууһун Нам сэлиэнньэтигэр саҥа аһыллыбыт Култуура уонна духуобунас киинин саалатыгар суруналыыстарга улахан пресс-кэмпириэнсийэ ыыппытыттан саҕалыыбын. Суруналыыстар өрөспүүбүлүкэ Аҕа баһылыгыттан тугу ыйыппыттарын, онно туох хоруйу ылбыттарын туһунан бүгүҥҥү хаһыаттан билиэххит.

Тутуу – сайдыы мэктиэтэ диэн мээнэҕэ эппэттэр. Ханна да тиий,  бастаан утаа  ол сир-уот  тутууларын көрөбүт. Саха сиригэр ааһан эрэр сыл устата инвестиционнай, национальнай уо.д.а. тустаах бырагыраамалар чэрчилэринэн элбэх саҥа тутуулар дьэндэһэн үлэҕэ киирбиттэрэ махталлаах дьыала. Олортон сүрүннэрэ — бүгүҥҥү хаһыакка.

Саха сирин нэһилиэнньэтин олоҕор-дьаһаҕар айылҕа алдьатыылаах дьайыыларыттан уонна тастан араас куттал суоһаабатын хааччыйыы эйгэтигэр балачча уустук сыл ааста. Ол эрээри, буолан ааспыт тургутуулаах түгэннэри этэҥҥэ туоруурга бэлэм баара көһүннэ. Бу хайысхаҕа сыл сүрүн түмүктэрин уонна инники соруктар тустарынан СӨ нэһилиэнньэтин олоҕор-дьаһаҕар куттал суох буолуутун хааччыйар Судаарыстыбаннай кэмитиэт бэрэссэдээтэлэ Дмитрий Лепчиков ааҕааччыларга сиһилии билиһиннэриитин кытта билсиҥ.

Кэлэр сылга Саха сирэ биир улахан бөдөҥ суолталаах тэрээһинигэр – Тымныы полюһугар Өймөкөөҥҥө ыытыллар Олоҥхо ыһыаҕар улуустартан уонна дойду эрэгийиэннэриттэн 10 000 ыалдьыт кэлэрэ былааннанар (улуус нэһилиэнньэтин ахсаана 8 тыһыынча курдук киһи). Маны таһынан, хас да федеральнай миниистир Олоҥхо ыһыаҕар сылдьыан баҕарарын биллэрдэ. Биллэн турар, олус улахан далааһыннаах тэрээһин Өймөкөөн улууһун социальнай-экэнэмиичэскэй сайдыытыгар биллэр хамсааһыны таһаарыаҕа. Бүгүн Саҥа дьыллааҕы хаһыаппыт ыалдьыта – Өймөкөөн улууһун баһылыга Иннокентий Сивцев.

18 сааһыттан 85-с хаарыгар үктэммит Тымныы Моруос оҕонньор оруолун толорбут киһи баарын иһиттэҕинэ, үгүс киһи соһуйара чахчы. Дьэ, оннук киһи баар эбит! Мэҥэ Хаҥалас улууһугар 2-с Наахараҕа олорор Иван Павлович Никаноров Саҥа дьыл бырааһынньыгар Тымныы оҕонньор буолан бар дьонугар эҕэрдэтэтин тиэрдибитин туһунан бүгүҥҥү хаһыакка ааҕыҥ.

2023 сыл — Куруолук сыла. Бу сылга күн сирин көрбүт Саха сиригэр биллэр-көстөр дьонтон кинилэр олохторун кэрчигиттэн билсиэн баҕалаах киһи үгүһэ чахчы. Ааҕыҥ уонна сэргээҥ.

Айылҕалаах дьоммут этиилэрэ суох Саҥа дьылбытын хайдах бэлиэтиэхпитий? Хас сыл аайы киһи барыта, улаханныын-кыралыын Саҥа дьылтан туох эрэ дьиктини, кэрэни күүтэр. Саҥа үүнэр сыл алыптаах түүнүгэр киһи аймах саамай кистэлэҥ баҕа санаатын этэр, үчүгэйгэ, үтүөҕэ эрэнэр. Бары даҕаны бу күүтүүлээх, долгутуулаах кэлэр сыл хайаан да ааһан эрэр сыллааҕар ордук буолуо, кыһарыйыы, хомолто, аймалҕан кэннибитигэр хаалыаҕа диэн эрэнэр. Оттон бу кэлэр 2023 сыл тугу түстүүрүй, биһиги тугу кэтэһэбитий? Ол туһунан саха биллиилээх айдарыылаахтара,  чараас эйгэ дьоно туох дииллэрий? Хайаан да ааҕыҥ, олус интэриэһинэй!

Саҥа дьыллааҕы уһун өрөбүл биир сүрүн моһуога – аралдьыйыы аҕыйаҕа. Таһырдьа томороон тымныы, хайыһар, хаҥкы кэмэ кэлэрэ ыраах, эгэ шашлык астааһына кэлиэ дуо. Кэнсиэрдэри күн аайы кэрийиэҕи дьиэ кэргэн бүддьүөтэ хааччахтыыр, уонна сылаалаах даҕаны. Онон бырааһынньык минньигэс остуолуттан тэйдэххэ, биир сүүйтэриитэ  суох бииргэ түмсэн аралдьыйар ньыманан – киинэни көрүү буолар.  Дьэ, Саҥа дьыллааҕы  өрөбүллэргэ ханнык сахалыы киинэни көрүөххэ сөбүй? Ааҕыҥ уонна сэргээҥ.

Ааспыт нэдиэлэҕэ “Саха сирэ” хаһыат эрэдээксийэтин айар кэлэктиибигэр үөрүүлээх күн буолла. Ол курдук, САССР 100 сылыгар уонна өрөспүүбүлүкэҕэ Ийэ сылыгар элбэх оҕолоох ийэлэри үйэтитэр аналлаах “Ийэ баар бу сиргэ – аан дойду аанньала” кинигэ ааҕааччыларбытыгар дьоһун бэлэҕинэн буолла. “Сахамедиа” холдинг уонна “Саха сирэ” хаһыат эрэдээксийэтэ күн сирин көрдөрбүт кинигэлэригэр Саха сирин элбэх оҕолоох ийэлэрин туһунан ахтыылар киирдилэр. Ахтыылары хомуйуу быйыл сайыҥҥыттан саҕаланан, бастакы чааһыгар лоп курдук сүүс суруйуу киирдэ. Онон, биэс уонна онтон элбэх оҕону ииппит, олох киэҥ аартыгар таһаарбыт,  хорсун-хоодуот үлэһит, үтүө санаалаах ийэлэрбит олохторо барыбытыгар үтүө холобурунан буолуоҕа. Кинигэни хаһыат үлэһиттэрэ бэйэлэрин кыахтарынан оҥорон-таҥан таһаардылар.

“Саха сирэ” хаһыат бырааһынньыктааҕы нүөмэригэр, буоларын курдук, сыл бэлиэ түгэннэрэ уонна дьоруойдара,  сылларынан уонна ыйдарынан 2023 сыллааҕы гороскоп, араас сүбэлэр, минньигэс ас ырысыаптара бэчээттэннилэр. Онон “Саха сирэ” хаһыаты бүгүн киоскалартан ылан ааҕыҥ, бырааһынньыктааҕы настырыанньаны иҥэриниҥ. Барыгытыгар дьолу-соргуну, эйэлээх нус-хас олоҕу!

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
13 июня
  • 13°C
  • Ощущается: 12°Влажность: 58% Скорость ветра: 3 м/с

Сообщить об опечатке

Текст, который будет отправлен нашим редакторам: