Бүгүн, балаҕан ыйын 27 күнүгэр, Судаарыстыбаннас күнүгэр “Саха сирэ” хаһыат саҥа сайтын сүрэхтээтэ. Сайтка хаһыат матырыйаалларын таһынан өрөспүүбүлүкэ, Арассыыйа, аан дойду күннээҕи сонуннара тахса туруохтара.
Хаһыат сүрүн эрэдээктэрэ Чокуур Гаврильев иһитиннэрбитинэн, сайт бүгүҥҥүттэн үлэтин саҕалаата.
– Хаһыаппыт былырыын тэриллибитэ 100 сылын бэлиэтээбиппит. “Саха сирэ” бастакы сахалыы тылынан тахсыбыт “Манчаары” хаһыаттан силистэнэн-мутуктанан тахсар. Үбүлүөйбүт кэмигэр хаһыаппыт бэйэтэ туспа сайтаах буолуохтаах диэн былааннаан быйыл Судаарыстыбаннас күнүн көрсө үлэбитин түмүктээтибит. Үөрүүлээҕэ баар, сайты оҥорууга “Сахамедиа” хампаанньабыт исписэлиистэрэ бэйэлэрэ үлэлэстилэр. Билигин хаһыаты таһынан икки сайтынан үлэлиэхпит. “Саха сирэ” сүрүн сайпыт буолуоҕа, ону сэргэ “Эдэр саас” сайт бэйэтин хайысхатынан салгыы үлэлии туруоҕа, – диэн этэр.
Ил Дархан пресс-сэкирэтээрэ Афанасий Ноев бэлиэтииринэн, “Саха сирэ” хаһыат Судаарыстыбаннас күнүгэр сүрэхтэммитэ, бастакы хардыытын оҥорбута суолтата улахан.
– Арассыыйа саҥа историятыгар 1990 сыллаахха балаҕан ыйын 27 күнүгэр бэйэтин судаарыстыбаннаһын, суверенитетын биллэрбит күнэ буолар. Саха сирин бүттүүнэ бары да бу күнү ураты күн быһыытынан сыаналыыбыт. Историческай күҥҥэ “Сахамедиа” холдинг, “Саха сирэ” хаһыат бэйэтин сайтын сүрэхтээбитэ ураты суолталаах. “Саха сирэ” хаһыат 90-с сыллартан саҕалаан саҥа олоҕу тутууга хара маҥнайгыттан баһылыыр-көһүлүүр миэстэни ылбыта. Хаһыат саҥа үйэ ирдэбилинэн бэйэтэ эрдэ сайтаах этэ, онтон 2016 сыллаахха саҥалыы тыыннаах “Эдэр саас” сайтаммыта. Оттон билигин өссө кэҥээн “Саха сирэ” бэйэтин аатынан сайтанна. Саҥа бырайыак бэйэтин тула дьону-сэргэни түмүөҕэ диэн бүк эрэллээхпин, – диэн этэр.
“Сахамедиа” холдинг генеральнай дириэктэрэ Виктор Колесов хаһыат саҥа сайтын таһынан кыһын өссө биир саҥа бырайыак сүрэхтэниэҕин туһунан иһитиннэрдэ.
– Хаһыат эрдэ “Эдэр саас” сайтынан олорбут буоллаҕына, билигин өрөспүүбүлүкэбит сүрүн хаһыата бэйэтэ туспа сайтанна. Маны таһынан “Сахамедиа” интернеккэ сахалыы көрдүүр сайты оҥоро сылдьар. Ахсынньыга бу бырайыакпытын сүрэхтиэхпит. Онон бырайыактарбыт манан эрэ түмүктэммэттэр, – диэн иһитиннэрэр.
Саха сирин суруналыыстарын сойууһун бэрэссэдээтэлэ Галина Бочкарева Сочи куораттан эҕэрдэтин ыытта. Саха сирин суруналыыстарын дэлэгээссийэтэ билигин Сочига “Вся Россия” диэн фестивалга кытта сылдьар.
– Икки судаарыстыбаннай тыллаах өрөспүүбүлүкэ буоларбытынан, икки тылы тэҥинэн тутуохтаахпыт. Сахалыы сайтар аһыллаллара олус кэрэхсэбиллээх. “Саха сирэ” хаһыат саҥа бырайыага өссө да үрдүк ситиһиилэри, саҥа арыйыылары аҕаллын. Саҥа сайт баай ис хоһоонноох, сойбот сонуннаах, элбэх ааҕааччылаах буоларыгар баҕарабын, – диэн иһитиннэрэр.
Төрөөбүт күҥҥүнэн, Дьокуускай! Дьокуускай -- биһиги өрөспүүбүлүкэбит тэбэр сүрэҕэ, манна устуоруйа уонна аныгы кэм, үгэстэр…
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…