«Саха сирэ» хаһыат суруналыыһа Ангелина Васильева — «Айар дьон» биэриигэ

Бүгүн суруналыыс, суруйааччы Ангелина Васильева «Саха»НКИХ «Айар дьон» биэриитигэр кыттыыны ылла. 

Биэриини эрэдээктэр Татьяна Степанова ыытта. Айар куттаах Ангелина олох кыра сааһыттан хоһоон айар кэбиһэр эбит. Аҕата саха тылын учуутала буолан, оҕотун ааҕыы абылалаҥар оскуолаҕа киириэн инниттэн уһуйбут. Ол да иһин кыысчаан алын сүһүөх кылаастарга Жюль Верн айымньытын ааҕар буолбут.  Ангелина Амма Аччыгыйын «Сааскы кэмин» ордук үлүһүйэн аахпытын ахтан ылла. «Олох биир ыйынан ааҕан бүтэрбитим. Оҕо буолан,  3D киинэ лиэнтэтин курдук оҥорон көрөр этим», — диэн бэркэ  бэлиэтээтэ суруналыыс.

Салгыы Ангелина Васильева оҕону ааҕыыга үөрэтиигэ, саха тыллаах оҥорууга болҕомтотун уурда. «Кырачаан киһиэхэ олоҕу анаара үөрэниитигэр үс сааһыгар диэри үөрэтэҕин. Онно кини тугу истибитин көрбүтүн көмпүүтэр курдук ылынар, өйүгэр «бырагыраамалаан» кэбиһэр. Ол курдук, олох кыратыттан омук тылынан саҥара сырыттахха да, түгэх өйүнэн иҥэринэн омуктуу саҥарар буолуоҕа. Ол иһин төрөөбүт сахатын тылыгар оҕону үс сааһыгар диэри үөрэтиэххэ наада«, — диэн бэлиэтээтэ.

— Өбүгэлэрбит оҕону кытта сылдьан, наар билэр холобурдарын кэпсээн, олоххо интэриэһи тардаллара. Аныгы төрөппүттэр оҕо ытаабатын, мэһэйдээбэтин эрэ  дииллэр. Ол да иһин оҕо төлөпүөнтэн арахсыбат. Мин оҕолорго анаан «Аптаах таас» диэн остуоруйа-кэпсээн суруйбутум. Бу кинигэбин оскуолаларга, бибилэтиэкэлэргэ оҕолору мунньан,  төрөппүттэрин кытыннаран ырытыы оҥорбуттара. Оҕолор санааларын истэн олус үөрбүтүм. Биир төрөппүт кэлэн «10 саастаах оҕоҕо сөптөөх сахалыы кинигэ суох. Оттон бу кинигэни оҕом олох тартаран туран, умсугуйан аахта» диэн эппитэ — миэхэ улахан наҕараада этэ, — диэн санаатын үллэһиннэ Ангелина Васильева.

«Саха сирэ» хаһыат суруналыыһа Ангелина Васильева, кырдьык да, ис иһиттэн айар куттаах киһи. Кини суруналыыс үлэтин көмүлүөк оһоҕу кытта сибээстээтэ: «Уокка мас эбэн биэрэн дьиэни-уоту сылытаҕын. Син ол кэриэтэ биһиги, суруналыыстар, матырыйаалларбыт уокка мас ууран биэрэрдии, дьоҥҥо сылааһы уонна сырдыгы тарҕатыыга тэҥнээхтэр«, — диэн бэртээхэй тэҥнэбили оҥордо.

Ааҕааччылар санааларын астына эттилэр, суруйааччы, суруналыыс быһыытынан Ангелина Васильева айар үлэтигэр ситиһиилэри баҕардылар.  Булуҥтан эрийбит ааҕаачы  Анегина Николаевнанан сирэйдээн, бары айар куттаах дьоҥҥо анаан «Иэйии» диэн хоһоонун анаата.

Кэскиллээх сырдык толкуйдаах, саха тылын сүмэтин иҥэринэн сылдьар Сунтаартан төрүттээх кэллиэгэбитигэр Ангелина Васильеваҕа «Айар дьон» биэрии кыттааччылара алгыс тылы анаабыттарыгар кыттыһан, айымньылаах үлэтигэр ситиһиини баҕарабыт!