«Саха сирэ» хаһыат тугу суруйда?

Кэнники кэмҥэ тыа сиригэр саха ынаҕын иитиинэн дьарыктанар буоллулар.

Ол курдук, Мэҥэ Хаҥалас улууһугар Хаатылыма нэһилиэгин олохтооҕо, үрдүк үөрэхтээх бэтэринээр быраас Александра Игнатьева уонна Ходоро нэһилиэгэр Аркадий Николаевич Дмитриев бу ынахтары иитэллэр.  Бүгүн “Тыа сирэ” балаһаҕа Александра Семеновна уопутун туһунан “Сахам ынаҕын туохха да биэрбэппин” диэн суруналыыс Женни Стрюкова матырыйаалыгар ааҕыҥ.

“Бу күннэргэ социальнай ситимнэринэн биир учууталга үрүҥ көмүс киэргэл биэрбиттэрин туһунан видеоны үгүстэр көрбүккүт буолуо, ол да иннинээҕи сылларга ити курдук улахан суумалаах бэлэхтэри оҥороллорун туһунан уора-көстө кэпсииллэрэ, суруйаллара. Дьиҥэр, учууталлар баһыйар улахан аҥаардара “миэхэ маннык бэлэх наада”, “миэхэ онтум суох” диэн аһаҕастык эппэттэрэ чахчы. Бэлэх сууматын хайдах быһааралларый? Аныгы төрөппүттэр үлэттэн быыс булбаттар, оҕо төһөнөн улаатар, соччонон оскуолаттан тэйэн иһэллэр. Ити кистэл буолбатах. Ол иһин көхтөөх, “яжмать” төрөппүттэр муоһаны бэйэлэрин илиилэригэр ылаллар, дьэ уонна таптаабыттарынан “салайаллар”. Аҕыйах сыллааҕыта биир учууталга букатын 80 тыһ. солк. суумалаах бэлэҕи оҥорбуттар үһү диэн соһутан тураллар” диэн суруйан туран, сиһилии суруналыыс Людмила Попова анаан ырытыытын хайаан даа ааҕыҥ уонна сэргээҥ.

Элбэх оҕолоох эдэр ыал Ноевтар иккиэн күн аайы туох эрэ саҥаны оҥоро, айа-тута сылдьар дьон. Кинилэр, төһө да күн солото суох буоллаллар, былааннаабыт соруктарын олоххо киллэрэргэ дьулуһаллар. “Мин оҕо эрдэхпиттэн иистэнэбин” диэн соһутта ыал аҕата Алексей Ноев кэпсэтиибит саҕаланыытыгар. Мин, бастаан утаа “сыыһа иһиттим дуу…” дии санаан, “иистэнэбин даа?..” диэн хос ыйыттым. Өссө оскуола эрдэхтэн 12 саастааҕыттан иистэнэр Чурапчы урбаанньытын уонна кини кэргэнэ Ольга Ноевалыын кэпсэтиибин бүгүҥҥү хаһыакка ааҕыҥ.

“Соторутааҕыта социальнай ситимнэринэн кылааты булбуттар үһү диэн сурах тарҕаммыта. Бастаан утаа кимнээх ханна булбуттара биллибэт этэ. Ол эрээри аныгы сибээс үйэтигэр өр буолбатаҕа, булбут дьон СӨ Култуурунай нэһилиэстибэни харыстыыр управлениетыгар эрийэн тахсан, былыргы маллары булбуттарын туһунан иһитиннэрбиттэрэ. Сонно Ем. Ярославскай аатынан Саха сиринээҕи судаарыстыбаннай түмэл исписэлиистэрэ эспиэрдиир хамыыһыйа тэринэн, бэс ыйын 4–5 күннэригэр миэстэтигэр көрөн-истэн, чинчийэн кэллилэр”, — диэн суруйан туран, суруналыыс Антонина Эверстова хаһыакка сиһилии сырдатта.

“Кэлиҥҥи кэмҥэ саха таҥаһа аныгылыы истииллэннэ. Саха иистэнньэҥнэрэ, модельердара араас аныгылыы моһуоннаах таҥаһы-сабы айан, тигэн саха таҥаһын ураты трендын айан таһаараллар. Билигин аны сахалыы балетка муодата быйылгы ыһыах трендэ буолла. “Иис-Уус Харыстас” маҕаһыыҥҥа маннык сымнаҕас тирииттэн балеткалар атыыланаллар. Киһи атаҕа тириппэт, соппуоска курдук уһун оһо суох. Ыйааһына чэпчэки. Хонуу устун оргууй дугунан хаамарга мантан ордук туох наада буолуой? Маҕаһыын менеджэригэр сибээскэ тахсан бу балеткалары ким оҥорорун сурастыбыт”. Ааптарыскай дизайннаах балеткалар атыыга хамаҕатык баралларын, бу сайыҥҥы тренд буолбутун туһунан маҕаһыын менеджерэ санаатын үллэстиитин,  балеткалары ким айбытын  суруналыыс  Ульяна Захарова билиһиннэрдэ.

Аҕыйах хонугунан   куорат олохтоохторо, ыраахтан-чугастан кэлэр ыалдьыттар биир улахан түһүлгэҕэ – Туймаада ыһыаҕар тоҕуоруһа мустуохтара. Ыһыах биир улахан түһүлгэтинэн, мэлдьи буоларын курдук, “Дыгын оонньуулара” буолара саарбаҕа суох. Түгэнинэн туһанан, бүгүн “Дыгын оонньууларын” 7 төгүллээх кыайыылааҕа, номоххо киирбит Уйбаан Белолюбскайы кытары “Итии чэй” рубрикаҕа суруналыыс Надежда Егорова сэһэргэстэ.

“Дьиэбэр үлэлии, суруксуттуу олорон төлөпүөнүм “кылыр” гыммытыгар арыйан көрбүтүм, социальнай ситимҥэ арай тэрилтэбит генеральнай дириэктэрэ бэйэтинэн олорор хаартыската итиэннэ суруга тахсан кэллэ. Дорооболоһон баран, кэпсэтии баар буолла, бу кэпсэтиибит туһунан ханна да быктарыа суохтааххын диэбит. Салгыы эн уонна буҕалтыарыйа икки ардыгытыгар хаһан эмит мөккүөрдээх боппуруос, өйдөпөт быһыы тахса сылдьыбыта дуо, диэн суруйан ыйыппыт.

Кырдьаҕас киһи, улахан салайааччым тус бэйэтинэн кэпсэтэн эрэриттэн, соһуччу ыйытыытыттан хайдах эрэ мах бэрдэрэн, тоҕо итинник ыйытта диэн таайа сатаан эппиэттэһэн суруйсан бардым. Мин бастакы алҕаһым, бу генеральнайым дуу, атын киһи дуу диэн саараҥнаабакка, тутатына суруйсан киирэн барбытым буолар. Дьиҥинэн кэпсэппит төлөпүөн нүөмэрин көрүөхтээх этим, онтум олох да атын эрэгийиэн төлөпүөнүн нүөмэрэ эбит! Түөкүттэр генеральнай хаартыскатын олордон болҕомтобун аралдьытар, сэрэҕэ суох оҥорор ньымалара эбит. Суруйан кэпсэтэрин быыһыгар тойоммун: “Тоҕо итинник ыйытарбын билигин быһаарыам”, — диэн саҥартылар. Билэр куоласпын истэн, сөп буолан хааллым, тугу диир эбит диэн бүтүннүү кулгаах-харах иччитэ буоллум…”. Салгыы туох буолбутун Уйбаан Силиги матырыйаалыттан “Саха сирэ” хаһыаттан билиэххит.