«Саха сирэ» хаһыат уопсастыбаннай кэрэспэдьиэнэ улуус Ытык сүбэтин салайааччытынан талылынна

Бу күннэргэ Мэҥэ Хаҥалас улууһун нэһилиэктэрин уопсастыбанньыктара  түмсэн, муниципалитет баһылыгын кытта сирэй көрсөн, улуус сайдыытыгар туһуламмыт бэйэлэрин көрүүлэрин, санааларын үллэһиннилэр.

Бу тэрээһин туһунан Мэҥэ Хаҥалас улууһун дьаһалтатын пресс-киинин сулууспатыттан Анастасия Федорова иһитиннэрдэ:

  — Улуус Ытык сүбэтин уонтан тахса сыл салайан кэлбит Василий Эверстов уопсастыбаннай түмсүү ыыппыт үлэтин  сырдатарыгар «Кэлиҥҥи сылларга эдэр дьон «Мин Мэҥэ Хаҥалаһым», «Мин төрөөбүт дойдум», «Дойдум туһугар үлэлиибин, үөрэнэбин уонна сайдабын» диэн санаа дууһаларыгар бигэтик иҥэн,  салҕанан барарыгар баҕарабын», — диэн бэлиэтээтэ. Кини бастаан утаа 34, кэлин 29 буолан олус түмсүүлээхтик, күүскэ үлэлээн кэлбиттэрин аҕынна уонна «Хас биирдии сүбэбит, ардыгар итэҕэһи арыйыыбыт, улууспут сайдыытыгар туһуланна», — диэн этиитин уопсастыбанньыктар бары олус биһирии иһиттилэр.

Баһылык Дмитрий Тихонов Ытык сүбэ  чилиэннэрин  таһаарыылаах үлэлэрин бэлиэтээтэ уонна инникитин даҕаны сүбэ-ама буола туралларыгар баҕа санаатын этэн туран, Махтал суруктары туттарда.

Биллэн турар, Ытык сүбэ саҥа састаабын талыыга болҕомто уурулунна. Биир санаанан мустубут дьон салайааччынан көхтөөх уопсастыбанньык Зиновий Игнатьевы таллылар.

«Биһиги тыа хаһаайыстыбатын салаатын өрө тутар улуус буоларбытынан, бу хайысхаҕа анаан ылсан үлэлиэхпит. Нэһилиэктэрбит, улууспут дьаһалталарын кытта ыкса үлэлэһэн, кинилэргэ өйөбүл буолуохпут», — диэн бэлиэтээтэ Зиновий Иванович.

Саҥа талыллыбыт Ытык сүбэ салайааччытыгар Зиновий Игнатьевка уонна уопсастыбаннай тэрилтэ актыыбыгар төрөөбүт Мэҥэлэрин сайдыытыгар туһуланар үлэлэригэр бары күүстэрин ууран туран үлэлииллэригэр эрэнэбит уонна таһаарыылаах үлэни баҕарабыт.

Зиновий Игнатьевы, «Саха сирэ» хаһыат, «Эдэр саас» уонна «Саха сирэ» саайтарга өрүү сонуннарын ыытар, санаатын үллэстэр биир көхтөөх уопсастыбаннай кэрэспэдьиэммитин дьонун-сэргэтин эрэлин ылан, Мэҥэ Хаҥалас улууһун Ытык сүбэтин салайааччытынан анаммытынан эҕэрдэлиибит! Өрүү бүгүҥҥүҥ курдук уопсастыбаннай олох үөһүгэр сылдьан, аныгы үйэ тэтимин кытта тэҥҥэ хардыылаан, дьоҥҥун-сэргэҕин үтүөҕэ, сырдыкка, үйэлээххэ сирдээн ис, Зиновий Иванович!

Хаартыска — Анастасия Федорова түһэриитэ.