«Саха сирэ» хаһыат ыыппыт куонкуруһун кыайыылаахтара билиннилэр

«Саха сирэ”  хаһыат,  sakha-sire.ru саайт Арассыыйаҕа Дьиэ кэргэн, Саха Өрөспүүбүлүкэтигэр Оҕо саас сылларыгар анаан «Дьиэ кэргэнинэн ыллыыбыт» куонкуруһу биллэрэн, сайаапкалары ыам ыйыттан хомуйбута. 

Сүрүн балаһыанньа быһыытынан, куонкуруска дьиэ кэргэнинэн  төһө баҕарар ахсаанынан кыттыахтарын сөбө. Кыттааччылар куонкуруска дьиэ кэргэнинэн ыллаабыт видео-устууларын ыыппыттара.

Онтон дьэ куонкуруска киирбит отучча сайаапкаттан уон бастыҥ талыллан,  Туймаада улуу тунах ыһыаҕын кэмигэр Үс Хатыҥҥа  «Саха сирин» түһүлгэтигэр түмүктүүр түһүмэххэ долгуйа муһунна. Кыттааччылар бары сахалыы маанытык таҥнан, этэргэ дылы, ох курдук оҥостон кэлбиттэр.  Киэҥ нэлэмэн өрөспүүбүлүкэбит бары кэриэтэ улуустарыттан кэлбиттэрэ тэрийээччилэри да, ыһыах ыалдьыттарын да үөртэ.

Дьэ, эрэ сүрүн кыттааччылар кимнээхтэрий?

Ньургуйаана Семеновна, Афанасий Юрьевич Прокопьевтар (Мэҥэ Хаҥалас)

София Альбертовна, Алексей Юрьевич Фоминнар (Хаҥалас улууһа)

Надежда Игоревна, Юрий Васильевич  Яроевтар (Дьокуускай)

Ксения Анатольевна, Алексей Петрович Вензеллэр (Горнай)

Саина Егоровна, Сергей Сергеевич Григорьевтар  (Уус Алдан)

Елизавета Спиридоновна, Герман Неустроевтар  (Мэҥэ Хаҥалас)

Айталина Виссарионовна, Гаврил Макарович Крыловтар (Дьокуускай)

Сардаана Николаевна, Иван Николаевич Ивановтар (Дьокуускай)

Олеся Владимировна,  Фёдор Федорович  Колесовтар

Светлана Петровна, Александр Степанович  Кондаковтар (Дьокуускай)

Ыраахтан-чугастан тоҕуоруһа мустубут кыттааччылары «Сахамедиа» холдинг генеральнай дириэктэрин солбуйааччы Чокуур Гаврильев уонна «Саха сирэ» хаһыат эрэдээктэрин солбуйааччы Анивера Акимова эҕэрдэлээтилэр уонна куонкуруһу иилээн-саҕалаан ыыттылар.

Дьүүллүүр сүбэҕэ Саха Эстрадатын тыйаатырын артыыската, СӨ үтүөлээх артыыһа Тамара Попова, ырыаһыт, мелодист Фатина Иванова, «Саха сирэ» хаһыат бэтэрээнэ, СӨ култууратын үтүөлээх үлэһитэ Татьяна Маркова уонна хаһыат суруналыыһа, СӨ үтүөлээх суруналыыһа Надежда Егорова үлэлээтилэр.

Кыттааччылар үгүстэрэ  видеоҕа уһуллубут ырыаларыттан атын ырыаны толорон, репертуардара киэҥин кэрэһилээтилэр. Биир көрөөччү: «Ыһыах элбэх бырагырааматыттан хата эһиги куонкурускутун эрэ толору уонна астына көрдүм» диэбитин итэҕэтэн,  кыттааччыларбыт талааннара, сыанаҕа тутта-хапта үөрүйэхтэрэ, көстүүмнэрэ сөхтөрдө. Ол курдук, дьүүллүүр сүбэҕэ даҕаны  балачча уустук буолан таҕыста. Ол да буоллар, күрэхтэһии аата күрэхтэһии, ким эрэ кыайар, ким эрэ  үгүс уопуту ылан, инникигэ эрэллээх хаалар.

Күрэхтэһии аата күрэхтэһии…

Ол курдук, бастакы үрдэлгэ тахсан Кылаан кыайыылаахтарынан  ааттаммыт  Ксения Анатольевна, Алексей Петрович Вензеллэр  сүрүн бирииһи  – дьиэ кэргэнтэн икки киһи Өлүөнэ очуостарыгар путевканы  «Медиахолдинг» генеральнай дириэктэрэ  Виктор Колесовтан тутан, долгуйа үөрдүлэр. Кинилэр  ансаамбыллара  мусукаалынай үнүстүрүмүөннэрин кыайан аҕалар кыахтара суох буолан,  ыал аҕата Алексей Петрович Вензель бэйэтин тылыгар уонна мелодиятыгар  “Оо, Дайаана Дайаана” диэн ырыатын толордо.

Иккис үрдэлгэ  сахалыы үнүстүрүмүөн доҕуһуоллаах “Саха төрүт үгэстэригэр тиһилик” норуот ырыаларыттан толорбут Айталина Виссарионовна  Крылова  ийэтин уонна кыысчаанын кытта  тахсаннар, “Уруу” ювелирнай хампаанньаттан сэртипикээтинэн наҕараадаланнылар.

Үһүс үрдэлгэ  элбэх киһилээх, олус сэргэх толоруулаах София Альбертовна, Алексей Юрьевич Фоминнар таҕыстылар. Ыал эһээтэ Юрий Николаевич Фомин  үлэ бэтэрээнэ, эбээлэрэ Федора Ивановна  Фомина  СӨ үөрэҕириитин уонна култууратын туйгуна, аҕалара Алексей Юрьевич        Фомин  “Тыа сирин култууратын бастыҥ үлэһитэ” өрөспүүбүлүкэтээҕи куонкурус кыайыылааҕа, ийэлэрэ    София Альбертовна Фомина  бэйэ дьарыктаах. Фоминнар оҕолорун уонна сиэннэрин  Нарыйаананы,  Сандаараны,  Неллины кытта  Лина  Полякова тылыгар, Валерий Егоров мелодиятыгар “Дьоллоох дьиэ кэргэн” ырыанан кытыннылар уонна тыа сиригэр олус наадалаах тыынан наҕараадаланнылар.

Биһирэбил бириис хаһаайыннарынан буолбут  Сардаана Николаевна, Иван Николаевич Ивановтар  өрөспүүбүлүкэтээҕи «Аҕалар лигаларын» түмсүүтүн салайааччыта Айхал Габышев туруорбут балааккатын «Саха сирэ» хаһыат кылаабынай эрэдээктэрэ Александр Тарасов туттарда.

Куонкурус кыттыылаахтарын уонна кыайыылаахтары «Саха сирэ» хаһыат кэлэктиибэ Геннадий Бечеряков тылларыгар, Марианна Федотова -Намыына мелодиятыгар  «Утаппыт кэриэтэ олоруох» диэн ырыанан эҕэрдэлээтилэр.

Куонкурус туһунан сиһилии “Саха  сирэ” хаһыат от ыйын 5 күнүнээҕи нүөмэригэр   ааҕыҥ.

БЫҺААРЫЫ:

«Саха сирэ”  хаһыат,  sakha-sire.ru саайт өрөспүүбүлүкэтээҕи куонкурустары ыытара үгэскэ кубулуйар. 2022 сыллаахха  Туймаада ыһыаҕар “Саха сирэ ыллыыр”  өрөспүүбүлүкэтээҕи ырыа куонкуруһун ыытан, киэҥ сэҥээриини ылбыта. Саха АССР  төрүттэммитэ 100  уонна Арассыыйа норуоттарын култууратын үйэлээх баайын сылларыгар анаммыт   куонкурус   урукку сахалыы ырыалары  сөргүтэр, дьоҥҥо-сэргэҕэ тарҕатар иһитиннэрэр сыаллаах-соруктаах ааспыта.