Саха сирэ Казахстаны кытта сибээһэ кэҥиир

Санкт-Петербургдааҕы норуоттар икки ардыларынааҕы экэнэмиичэскэй пуорум чэрчитинэн бэс ыйын 15 күнүгэр Ил Дархан Айсен Николаев уонна  Казахстан Өрөспүүбүлүкэтин энэргиэтикэҕэ миниистирэ Алмасадам Саткалиев кэккэ боппуруостарга бииргэ үлэлээһини дьүүллэстилэр.

Ол курдук, Ил Дархан уонна Бырабыыталыстыба пресс-сулууспата иһитиннэрбитинэн, өрүттэр ИТ-эйгэтигэр, бааҥка үлэтигэр, эргиэҥҥэ уонна сиртэн хостонор баайы чинчийии уонна хостооһун боппуруостарын тула кэпсэттилэр.

Ил Дархан Айсен Николаев быйылгы сыл саҥатыгар Казахстан Өрөспүүбүлүкэтигэр сырыытыгар Бэрэсидьиэн Касым-Жомарт Токаевы, премьер-министр Алиханом Смаиловы, миниистирдэри кытта көрсүһүүтэ олус көдьүүстээҕин уонна үтүө түмүктэрдээҕин бэлиэтээтэ. Ол курдук, бу сырыы кэнниттэн, Саха сириттэн ИТ-хампаанньалар, бааннар, ювелирнай оҥоһуктары оҥорон таһаарар пиирмэлэр, араас табаардар уонна бородууксуйалары оҥорон таһаараар урбаанньыттар кыттыылаах  икки биисинэс-айан тэриллибитэ.

Эрдэ түһэрсиллибит сөбүлэҥ чэрчитинэн Саха сиригэр Хотугу Казахстан уобалаһын дэлэгээссийэтэ кэлэрэ күүтүллэр.