Саха сирэ “Көмүс күһүн”  быыстапка-дьаарбаҥкаҕа 69 мэтээли ылла

“Көмүс күһүн” Арассыыйа 26-с агро-бырамыысылыннай быыстапкатын салааларынан  куонкурустарын түмүгүнэн Саха сирин дэлэгээссийэтэ 69 мэтээли (ол иһигэр, 55 кыһыл көмүс, 9 үрүҥ уонна 5 боруонса) ылла.

Өрөспүүбүлүкэ Тыатын хаһаайыстыбатын министиэристибэтэ иһитиннэрбитинэн, быйыл агро-хайысхалаах оскуолалар 35 мэтээли (28 кыһыл, 3 үрүҥ, 4 боруонса) ылан,  ордук биһирэннилэр.

Саха сиринээҕи наука киинин М.Г.Сафронов аатынан ЯНИИСХ учуонайдара  уонна  дьоҕус инновационнай тэрилтэлэрэ 12 кыһыл, 3 үрүҥ, 1 боруонсаны мэтээллэри кытта,  РФ Тыатын хаһаайыстыбатын министиэристибэтин икки Махтал суругунан бэлиэтэннилэр. Ону таһынан саха пиэримэрдэрэ уонна тыа хаһаайыстыбатын тэрилтэлэрэ үрдүктүк сыаналаннылар.

«Биһиги сылтан сыл ахсын быыстапкаҕа саҥа бородууксуйалары, ол иһигэр агро-оскуолаларбыт бородууксуйаларын, туруорабыт. Маннык быыстапкаларга кыттыы – Саха сирин бородууксуйатын  оҥорон таһаарааччыларын федеральнай таһымҥа көрдөрөр, араас эрэгийиэннэр бэрэстэбиитэллэригэр билиһиннэрэр, ону таһынан үрдүк хаачыстыбатынан уонна минньигэһинэн уратылаах бородууксуйаларбытын билэллэригэр бэриллэр кыах”, — диэн өрөспүүбүлүкэ тыатын хаһаайыстыбатын уонна ас-үөл бэлиитикэтин миниистирэ Артем Александров санаатын үллэһиннэ.