Саха сирэ ОДьКХ эбийиэктэрин саҥардыыга 869 мөл.солк. ылыаҕа

Бүгүн, балаҕан ыйын 11 күнүгэр, Арассыыйа Бырабыыталыстыбатын бэрэссэдээтэлин солбуйааччы Марат Шакирзянович Хуснуллин салалтатынан ыытыллыбыт суһал ыстаап мунньаҕар Саха Өрөспүүбүлүкэтэ 869 мөл.солк. суумалаах казначейскай инфраструктурнай кирэдьииккэ сайаапка ыыппытын өйөөтүлэр. Бу туһунан Ил Дархан Айсен Николаев телеграм-ханаалыгар суруйар.

«Бу үбү саамай сүрүҥҥэ — ититиигэ уонна дьон олоҕун тупсаҕай оҥорууга ыытыахпыт. Алдаҥҥа гаас уматыгынан оттуллар үс улахан хочуолунай тутуллуоҕа, бу ититиини эрэллээх уонна экологичнай оҥоруоҕа. Нерюнгрига маастар-былаан иитинэн ититии ситимин саҥардыахпыт, мантан тыһыынчанан ыал олоҕун хаачыстыбата тутулуктаах», — диэн Ил Дархан суруйар.

Бу бырайыактар 2025–2027 сылларга олоххо киириэхтэрэ. Ил Дархан Марат Хуснуллиҥҥа уонна федеральнай биэдэмистибэлэргэ болҕомтолорун уонна өйөбүллэрин иһин махтанна.