Саха сирэ оҕо төрөөһүнүнэн Арассыыйаҕа тохсус-онус миэстэҕэ турар

Тэлэбиисэринэн биэриигэ ыытааччы: “Сэтинньи түмүгүнэн Саха сирэ оҕо төрөөһүнүнэн Уһук Илиҥҥэ рекорду олохтоото, манна туох миэрэ көмөлөстө?” – диэн Ил Дархантан ыйытта.

Тустаах ыйытыыга Айсен Николаев бу кэккэ уратылааҕын аһаҕастык этэр оруннааҕын ыйда. “Биһиги, хомойуох иһин, оҕо төрөөһүнэ эбиллэ турар диэн этэр кыахпыт суох. Биһиэхэ, дойдуга курдук эмиэ оҕо төрөөһүнэ намтаан иһэр. Ону кытта төрөөһүн таһыма балачча үрдүк таһымҥа турар. Билигин оҕо төрөөһүнүнэн дойдуга тохсус-онус миэстэҕэ, Уһук Илин уокурукка бигэтик бастакы сылдьабыт. Нэһилиэнньэ эбиллиитинэн Уһук Илиҥҥэ уонна дойдуга ахсыс миэстэҕэ турабыт.

2020 сылтан элбэх оҕолоох дьиэ кэргэн ахсаана эбиллэн иһэрэ үөрдэр. Бу сылларга үс тыһыынчаттан тахса ыалынан эбилиннэ, бу 10 %  чугаһыыр” – диэн иһитиннэрдэ.

Бу элбэх оҕолоох ыалы өйөөһүн чахчы үлэлиирин туоһутунан буоларын ыйар. Маныаха ийэни, оҕону кытта  сибээстээх, дьиэ кэргэҥҥэ көмөлөһөр араас социальнай төлөбүрдэр көрүллэллэрин, федеральнай бүддьүөтү кытта өрөспүүбүлүкэттэн 29,5 млдр. тыырылларын эттэ.