Саха сирэ олох хаачыстыбатынан рейтиҥҥэ 26-с миэстэҕэ таҕыста

Саха сирэ дойдуга олох хаачыстыбатын рейтинин индексынан 26-с миэстэҕэ таҕыста. Бу туһунан Айсен Николаев Национальнай социальнай көҕүлээһини олоххо киллэриигэ Сэбиэт мунньаҕар иһитиннэрдэ, диэн СӨ Ил Дарханын уонна Бырабыыталыстыбатын пресс-сулууспата суруйар.

2024 сыл түмүгүнэн Уһук Илин федеральнай уокурук субъектарын ортолоругар олох хаачыстыбатын рейтинин туһунан иһитиннэриини «Агентство стратегических инициатив по продвижению новых проектов» тэрилтэ генеральнай дириэктэрэ Ольга Курилова оҥордо. Кини Саха сирэ индексынан 44-с миэстэттэн 26-с миэстэҕэ тахсыбытын иһитиннэрдэ.

«Мин санаабар бу олус үчүгэй көрдөрүү. Олох хаачыстыбатын идексэ чахчы дьиҥнээх хартыынаны, ол иһигэр олохтоохтор бу территорияны кытта олохторун сибээстииллэрин көрдөрөр. Биһиги бу көрдөрүүлэр тупсубуттарын көрөбүт. Уһук Илин үс бастакы субъега — Сахалин, Саха сирэ уонна Бурятия», – диэтэ Ольга Курилова. Ил Дархан Айсен Николаев индекс көрдөрүүлэрин быһааран, Саха сиригэр бу хайысхаҕа өссө элбэх үлэ барыахтааҕын бэлиэтээтэ.

Кэнники сылларга Саха сиригэр олох хаачыстыбатын тупсарыыга туһуламмыт стратегическай бырагыраамалар ылылыннылар, инфраструктурнай уонна социальнай бырагыраамалар үбүлэнэллэр, ол иһигэр оҕолоох ыаллары өйүүр дьаһаллар. Бу туһунан сиһилии манна аах.