Хаартыска: Өлүөнэ өрүс тардыытын ууга салалтатын архыыбыттан
Саха сирэ сааскы халааны этэҥҥэ аһарарга анаан күүстээх бэлэмнэнии үлэтин саҕалаата. Туох үлэлэр ыытыллалларын туһунан өрөспүүбүлүкэ Баһылыга Айсен Николаев РФ Бырабыыталыстыбатын Бэрэссэдээтэлин солбуйааччы Дмитрий Патрушев ыыппыт бүтүн Арассыыйатааҕы селекторнай сүбэ мунньаҕар кэпсээтэ.
Дмитрий Патрушев кэпсээбитинэн, быйыл түспүт сөҥүү нуорматтан таһыччы элбэх, ону таһынан олунньу бүтүүтэ уонна кулун тутарга Арассыыйа Европатааҕы өттүгэр күн-дьыл тосту уларыйыан сөп. Бу, төттөрүтүн, уу таһыма кутталлаах бэлиэлэргэ тиийиитигэр тиэрдиэн сөп. Ону таһынан, Сибиир уонна Уһук Илин федеральнай уокуруктарыгар ыарахан балаһыанньа үөскүөн сөп.
Бырабыыталыстыба Бэрэссэдээтэлин солбуйааччы 2025 сылга 34 гидротехническэй уонна көмүскүүр тэрил тутуллубутун уонна өрөмүөннэммитин санатта. Быйыл бу үлэҕэ, ону таһынан уу эбийиэктэрин ыраастыырга 9 миллиард кэриҥэ солкуобай көрүллүбүт, бу ааспыт сыллааҕы үбүлээһинтэн 1 миллиардынан элбэх. Итини сэргэ быйылгыттан водохранилищелар үлэлэрин эрэсиимин сүрүннээһин Уу ресурсаларын федеральнай ааҕыныстыбатын (Росводресурсы) суһал кэтээн көрөр информационнай систиэмэтин саҥа модулун нөҥүө ыытыллыаҕа. Дмитрий Патрушев гидротехническэй тутуулары бөҕөргөтөргө, сэрэтэр тэрээһиннэри ыытарга, РСЧС территориальнай подсистемаларын бу тэрээһиннэргэ бэлэм оҥорорго соруйда.
Ил Дархан сааскы халааны этэҥҥэ аһарарга ылыныллар миэрэлэр тустарынан дакылааттаата. Айсен Николаев Арассыыйа Федерациятын гидрометеорологияҕа уонна айылҕаны кэтээһиҥҥэ сулууспатын иһитиннэриитигэр олоҕуран, Өлүөнэ, Халыма, Алдан, Амма өрүстэргэ муус харыыта тахсыан сөп диэтэ.
«Уопсайа 92 муус харыан сөптөөх учаастактарыгар мууһу кэбирэтэр тэрээһиннэр ыытыллыахтара. Бу Өлүөнэ, Халыма, Бүлүү, Алдан, Амма, Ньүүйэ, Токко өрүстэргэ, оттон 2025 сылга 79 учаастак баара. 2023-2025 сыллааҕы халааннары ырытыы түмүгүнэн Уу ресурсаларын федеральнай ааҕыныстыбатын өйөбүлүнэн ыытыллар үлэлэр кээмэйдэрэ улаатта уонна 13 саҥа учаастакка 161 га иэннээх Өлүөнэ, Халыма, Бүлүү өрүстэргэ кэбирэтэр үлэлэр ыытыллаллара быһаарыллыбыта», — диэтэ Айсен Николаев.
Гидрологическай балаһыанньаны кэтээһиҥҥэ 183 гидропост, ол иһигэр 121 бастайааннай уонна 62 кылгас кэмнээх постар баар буолуохтара. Муус харыытын суох оҥорорго суох оҥорор сыалтан 25 туонна дэлби тэптэрэр веществолар саппаастарын хааччыйыахтара уонна суһал бөлөхтөр састааптарыгар 2-лии хамаанда үлэтин тэрийиэхтэрэ.
Өрөспүүбүлүкэҕэ 301 гидротехническэй тутуу баар, хаһаайына суох гидротехническэй тутуулар суохтар. Уу ылыан сөптөөх сирдэртэн дьону көһөрөргө 293 кылгас кэмҥэ олорор пуун эрдэттэн бэлэмнэниэ, онно уопсайа 27513 киһи батыахтаах. Ону таһынан 55 тыһыынчаттан тахса сүөһүнү уонна сылгыны кылгас кэмҥэ тутарга 116 пуун саҥардыллыыта көрүллүбүт.
Кулун тутарга уонна муус устарга РСЧС Саха сиринээҕи территориальнай подсистематын салааларын, 16 муниципальнай тэриллии халаан уутун саахала суох аһарыыга бэлэмнэрин бэрэбиэркэлээн команднай-штабнай үөрэх ыытыллыаҕа.
Сиһилии: https://www.sakha.gov.ru/news/22500
Олунньу 7 күнүгэр "Чурапчы" айар түмсүү салайааччыта Римма Иннокентьевна Корякина-Хотууна уонна кини кыыһа Сардаана Корякина-Сардаана…
ИДьМ Дьокуускайдааҕы управлениетын наркотик эргиирин хонтуруоллуур отделын үлэһиттэрэ эрэгийиэннэр икки ардыларынааҕы наркокурьер үлэтин тохтоттулар. Суһал-көрдүүр…
Нерюнгри оройуонун Золотинка бөһүөлэгэр Ил Дархан Айсен Николаев бүгүн, олунньу 10 күнүгэр, Арассыыйа Дьоруойа, Хотугу…
Саха ыалын сиэрэ-туома. Итэҕэл быһыытынан, дьиэ Айыы аартыга аһыллар сиринэн, илин диэкинэн, ааннанар. Дьиэ тутуутун сүрүн…
Нерюнгрига маастар-былаан чэрчитинэн поликлиниканы саҥардан оҥороллор. РФ Бэрэсидьиэнэ Владимир Путин бигэргэппит маастар-былаанын чэрчитинэн, Нерюнгрига улахан…
«Мечел» бөлөххө киирэр «Мечел-Сервис» тимир атыылыыр хампаанньата Саха сиригэр Өлүөнэ өрүһү туоруур саҥа массыына суолун…