Саха сиригэр элбэх оҕолоох ыал ахсаана элбиир

ЗАГС салалтатын дааннайынан, от ыйыгар уолаттарга Лев, Александр, Михаил, Эркин, Мирон диэн ааттар киэҥник бэрилиннилэр. Оттон сэдэх ааттар испииһэктэригэр Адьян, Дансар, Джейсон, Назар киирдилэр.

От ыйыгар кыргыттары үксүн София, Аделина, Кэрэли, Амелия, Эмилия диэн ааттаатылар. Ураты ааттар быыстарыгар – Сибэкки, Эвилана, Ариона. 7 ый иһигэр Саха сиригэр уопсайа 6045 оҕо төрөөтө, ол иһигэр 2910 кыыс уонна 3135 уол оҕо. 2020 сылтан өрөспүүбүлүкэҕэ элбэх оҕолоох ыал ахсаана 10%-нан элбээн, 34,6 тыһыынчаттан таҕыста.

Ааспыт сылга оҕолор 44%-тара дьиэ кэргэҥҥэ үһүс уонна онтон кэлэр оҕолорунан төрөөбүттэр. 2024 сыл түмүгүнэн өрөспүүбүлүкэ нэһилиэнньэ үүнүүтүн тэтиминэн Арассыыйа Федерациятыгар 12-с миэстэни, оттон оҕо төрөөһүнүнэн — Уһук Илин эрэгийиэннэрин ортотугар 1-кы уонна дойдуга 10-с миэстэни ылла.

Дойду Бэрэсидьиэнэ Владимир Владимирович Путин дьиэ кэргэни, ийэ буолууну уонна оҕо сааһы өйүүр боппуруостарга улахан болҕомтотун уурар. 2025 сылга дойдуга «Дьиэ кэргэн» диэн саҥа национальнай бырайыак үлэтин саҕалыаҕа, онно сүрүн болҕомто Арассыыйа ыалларын этэҥҥэ буолууларыгар уонна олохторун хаачыстыбатыгар ууруллуоҕа.