Саха сирэ тутуу тэтиминэн дойдуга бастыҥнар истэригэр киирэр

Экэниэмикэ үүнэр тэтимин көрдөрөр биир сүрүн хайысханан дьиэ тутуутун салаата буолар. Арассыыйаҕа сыл бастакы ыйдара көрдөрөллөрүнэн, бу эйгэҕэ үлэ күүскэ баран эрэрэ көстөр. Холобур быһыытынан сыл бастакы ыйын, тохсунньуну ыллахха, Росстат чахчыларынан, дойдуга ортотунан тутуу үлэтэ 9,9% үрдээбитэ көстөр. Тохсунньу кыһын биир саамай тымныы ыйа, онон бу сыыппара сыллааҕы тэтимтэн намыһах буолуон сөп.

Ордук эрчимнээхтик тутуу үлэтэ барар  эрэгийиэннэр истэригэр киин уонна Уһук Илиҥҥи эрэгийиэннэрэ киирэллэр. Холобур, биһиги эрэгийиэммитигэр баараҕай үрдээһини Чукотка көрдөрөр – 13 төгүл үрдээһин! Ол эрээри бу сыыппара ис иһигэр киирдэххэ, тутуу тэтимэ эмискэ үрдээһинэ туспа төрүттээх – ааспыт сылларга Чукоткаҕа тутуу тэтимэ күүскэ түспүт, билигин хас даҕаны бөдөҥ эбийиэктэри тутуу саҕаламмыта бу курдук хас да төгүллээх үүнүүнү көрдөрбүт.

Эрэллээх үктэлинэн сайдан иһэр, ону кытта 1,8-2 төгүл тутуу тэтимин көрдөрбүт Уһук Илин эрэгийиэннэринэн Росстат дакылаатыгар Амур уобалаһан кытта Саха сирэ ааттаммыттар. Ону тэҥэ Забайкальскай кыраай уонна Еврейскай автономнай уокурук эмиэ куһаҕана суох көрдөрүүлээхтэр.

Киин эрэгийиэннэргэ ордук үчүгэй көрдөрүүлээх уобалаһынан Воронежскай ааттаммыт, ону тэҥэ Рязань, Смоленскай, Ярославль уонна Кострома диэки тутуу тэтимэ бэрт үчүгэй көрдөрүүлээҕэ бэлиэтэнэр.