Саха сирэ Улуу Кыайыы 80 сылыгар бэлэмнэнэр

Ил Дархан уонна СӨ Бырабыыталыстыбатын дьаһалтатын салайааччытын солбуйааччы Михаил Гасанбалаев 1941-1945 сыллардааҕы Аҕа дойду сэриитигэр Улуу Кыайыы 80 сыллаах үбүлүөйдээх тэрээһиннэрин бэлэмнэниир уонна тэрийэн ыытар оробуочай бөлөх мунньаҕын ыытта.

Михаил Гасанбалаев “оробуочай бөлөх  тэрийэр-иһитиннэрэр үлэнэн дьарыктаныаҕа. Сүрүн сорук – биэдэмистибэлэр икки ардыларыгар бииргэ үлэлээһини хааччыйыы буолар”  диэн туран, өрөспүүбүлүкэ Аҕа баһылыга Айсен Николаев Улуу Кыайыы 80 сыллаах үбүлүөйүн үрдүк таһымҥа ыытар соругу туруорбутун тоһоҕолоон бэлиэтээтэ. Мунньахха Аҕа дойду Улуу сэриитигэр Кыайыы 80 сылын көрсө сүрүн тэрээһиннэри тэрийиигэ туһуламмыт боппуруостары ырыттылар.

Ахсынньыга өрөспүүбүлүкэҕэ үүнэр көлүөнэни патриотическай иитиигэ былаас уорганнарын уонна уопсастыбаннай түмсүүлэр үлэлэрин бөҕөргөтөр соруктаах ыытыллар «Кыайыы Знамята» эстэпиэтэ саҕаламмыта. Ахсынньы 16 күнүгэр Дьокуускайга Аҕа дойду сэриитигэр Улуу Кыайыы 80 сылыгар норуоттар икки ардыларынааҕы волонтердар үөрэтэр эрэгийиэннээҕи киинннэрэ аһыллыбыта.

Сэрии уонна үлэ бэтэрээннэрин өрөспүүбүлүкэтээҕи Сэбиэтин бэрэссэдээтэлэ Вильям Иванов мунньахха Аҕа дойду Улуу сэриитин туһунан киинэлэри өрөспүүбүлүкэтээҕи киинэ тыйаатырдарыгар элбэхтик көрдөрөргө этии киллэрдэ. Мунньах күн сүрүн боппуруостарыттан биирдэстэринэн Улуу Кыайыы 80 сылыгар аналлаах тэрээһиннэри бэлэмнээһиҥҥэ уонна ыытыыга иһитиннэрэр-биллэрэр тиһиктэр сырдатыы үлэтин көхтөөхтүк ыытыылара бэлиэтэннэ. Таһаарыылар сүрүн тиэмэлэринэн историческай кырдьык, патриотизм, Аҕа дойду сэриитин уонна байыаннай дьайыы кыттыылаахтарын албан аатырдыы буолуохтара.