Саха сирэ уонна Беларусь успуорка кыттыгас бырайыактары үлэлэтиэхтэрэ

Алтынньы 1 күнүгэр Айсен Николаев уонна Беларусь Өрөспүүбүлүкэтин Национальнай олимпийскай кэмитиэтин бэрэсидьиэнэ Виктор Лукашенко бииргэ үлэлэһии туһунан кэпсэттилэр.

— Мас-рестлинг аан дойдуга киэҥник тарҕанан эрэрэ континентальнай уонна глобальнай мультиспортивнай оонньуулар бырагыраамаларыгар киириэ диэн эрэли саҕар. Бу үлэҕэ биһиги Беларусь өттүттэн өйөбүлү күүтэбит. Мас-рестлинг көрүҥүн аан дойдуга тарҕатарга күүспүтүн түмэн, бииргэ үлэлэһиэх этибит. Салгыы оҕо успуордун, национальнай көрүҥнэри өйүүр кыттыгас бырайыактары үлэлэтэргэ бэлэммит. Биһиэхэ художественнай гимнастика, чэпчэки атлетика, хайыһар успуорда, оҕунан ытыы көрүҥнэригэр тириэньэрдэри, спортсменнары бэлэмниир кыах баар, — диэн Ил Дархан эттэ.

Кини Виктор Лукашенкоҕа «Азия оҕолоро» оонньууларга Беларусь хамаандата көхтөөх кыттыытын иһин махтанна.

— «Азия оҕолоро» олус үчүгэй санааны, өйдөбүлү хаалларбыттара. Бу күрэхтэһиилэртэн саҕыллан, биһиги Азияҕа кыттыыбыт саҕаламмыта. Ыччаттарга да, улахан дьоҥҥо да Азия турнирдарыгар кыттар буолуохпут. Эһиги өрөспүүбүлүкэҕитигэр өрүү үөрүүнэн тиийиэхпит, — диэн Виктор Лукашенко эттэ.

Бу иннинэ Беларусь бэрэсидьиэнэ Александр Лукашенко кинилэр хамаандалара «Азия оҕолоругар» үрдүк көрдөрүүлэммиттэрин бэлиэтээбитэ.

Беларусь хомуур хамаандата «Азия оҕолоро» норуоттар икки ардыларынааҕы спортивнай оонньууларга аан бастаан кыттыбыта. Спортсменнар 78 мэтээли (27 кыһыл көмүс, 21 үрүҥ көмүс уонна 30 боруонса) ылан, уопсай ааҕыыга үһүс миэстэҕэ тахсыбыттара.

Ил Дархан, бырабыыталыстыба пресс-сулууспата.