Саха сирэ уонна Кытай бииргэ үлэлээһини кэҥэтэллэр

Саха сирин дэлэгээссийэтэ Кытай Норуодунай Өрөспүүбүлүкэтигэр сырыытын чэрчитинэн СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин уонна Цзянси провинциятын ойуур хаһаайыстыбатын управлениетын икки ардыларыгар бииргэ үлэлээһин туһунан сөбүлэһиигэ илии баттааһын үөрүүлээх сиэрэ-туома буолла.

Маны таһынан, «Өлүөнэ очуостара» национальнай паарка уонна «Поянху күөлэ» национальнай айылҕа заповеднигын, ону сэргэ Арассыыйа наукаларын академиятын Сибиирдээҕи салаатын криолитозонатын биологическай кыһалҕаларын институтун уонна «Поянху күөлэ» национальнай айылҕа заповеднигын икки ардыларыгар стратегическай бииргэ үлэлээһин туһунан дипломатическай докумуоҥҥа илии баттаннылар.

Баттаныллыбыт сөбүлэһиилэр айылҕа харыстабылыгар, биоразнообразиеҕа, научнай чинчийиилэргэ икки өттүттэн бииргэ үлэлээһини бөҕөргөтүүгэ туһуланаллар. Бу икки дойду ардыгар экотуризм уонна научнай бииргэ үлэлээһин сайдыытыгар биллэ көмөлөөх буолуоҕа.