Саха сирэ уонна Лев Толстой түмэлэ бииргэ үлэлииргэ сөбүлэстилэр

Ил Дархан Айсен Николаев «Изобразительнай искусствоҕа Л.Н. Толстой уобараһын эволюцията. Ге до Гинцбургтан» быыстапка аһыллыытыгар Дьокуускайга кэлбит Л.Н. Толстой аатынан судаарыстыбаннай түмэл дириэктэрин, суруйааччы хос сиэнин Владимир Толстойу кытта көрсүһүүнү ыытта.

Экспозиция Саха сирин Национальнай художественнай түмэлигэр Л.Н. Толстой аатынан Судаарыстыбаннай түмэл көмөтүнэн уонна өрөспүүбүлүкэ Ил Дарханын уонна Бырабыыталыстыбатын көхтөөх өйөбүлүнэн тэрилиннэ.

«Биһиги ускуустубаны уонна култуураны Саха сирин хас биирдии олохтооҕор  тиийимтиэ оҥорорго дьулуһабыт. Бу быыстапка – федеральнай уонна эрэгийиэннээҕи култуура институттара уопсай дьыала туһугар күүстэрин хайдах холбуулларын чаҕылхай холобура буолар. Биһиги Лев Толстой аатынан Судаарыстыбаннай түмэлгэ бу кыаҕы биэрбитигэр махтанабыт уонна уһун болдьохтоох бииргэ үлэлээһиҥҥэ эрэнэбит», – диэн Айсен Николаев бэлиэтээтэ.

«Мин Толстойга, нуучча суруйааччыларыгар уонна худуоһунньуктарыгар анаммыт быыстапкалар Саха сирин саамай ыраах муннуктарыгар – улуустарга, оскуола-интэринээттэргэ, култуура кииннэригэр сылдьыахтарын олус баҕарыам этэ», — диэн Владимир Толстой бэлиэтээтэ. Өрүттэр икки суолталаах үбүлүөйгэ — 2028 сылга бэлиэтэниэхтээх Лев Николаевич Толстой төрөөбүтэ 200 сылыгар уонна Саха сирин Национальнай художественнай түмэл 100 сылыгар бэлэмнэнии туһунан сөбүлэстилэр.

Киэҥ далааһыннаах култуурунай бырагыраамалары, кыттыгас быыстапкалары, айар оскуолалары уонна издательскай көҕүлээһиннэри, ол иһигэр сыыппара технологияларын туһанан, тэрийии былааннанар. Өрөспүүбүлүкэ баһылыга салгыы бииргэ үлэлээһин наадалааҕар эрэлин биллэрдэ.

«Биһиги Толстой түмэлин кытта бииргэ үлэлээһини салгыыр уонна сайыннарар санааны өйүүбүт. Биһиэхэ суолталаах култуурунай көҕүлээһиннэри олоххо киллэрэр уопсай кыах баар дии саныыбын», – диэн Айсен Николаев эттэ. Быыстапка суруйааччы живописька уонна скульптураҕа айыллыбыт уобараһын киэҥ палитратын хабар. Көрөөччүлэр ааттаах-суоллаах худуоһунньуктар уонна скульптордар үлэлэрин көрүөхтэрэ, кинилэр истэригэр Илья Репин, Николай Ге, Иван Крамской, Леонид Пастернак, Татьяна Львовна Толстая, Юлия Игумнова бааллар.

Быыстапка от ыйын 25 күнүттэн балаҕан ыйын 21 күнүгэр диэри Национальнай художественнай түмэл сүрүн дьиэтигэр, бу аадырыска: Дьокуускай к., Киров уул., 9, 2-с этээс, быыстапка саалата бары сылдьааччыларга анаан аһаҕас буолуоҕа.