Саха сирэ «Великий Северный поход: Арктика как искусство» бырайыакка кыттыста

Саха сирэ норуоттар икки ардыларынааҕы култуурунай-сырдатар «Великий Северный поход: Арктика как искусство» диэн бырайыакка кыттыста. Бу тэрээһин Хотугу муора суолунан айан 500 сылыгар ананар.

Эрэгийиэннээҕи түһүмэх сүрүн тэрээһининэн үөрүүлээх быһыыга-майгыга «СевМорПуть-500»  диэн боруонса статуэтканы  Ил Дархан Айсен Николаевка туттарыы буолла.  Бу өйдөбүнньүк бэлэҕи «Центр «Арктические инициативы» АНО дириэктэрэ Рустам Романенков туттарда.

Статуэтканы Арассыыйа норуодунай худуоһунньуга, РАХ академига Александр Ковальчук оҥорбут. Рустам Романенков иһитиннэрбитинэн, култуурунай эстафетаҕа Саха  сирэ кыттыһыыта улахан суолталаах. Манна номнуо Мурманскай, Архангельскай уонна Салехард куораттар  кыттыспыттар.

Өрөспүүбүлүкэҕэ кулун тутар 27 күнүттэн Национальнай художественнай түмэлгэ «Арктика как искусство» диэн экспозиция турар.