Саха сиригэр 100 төбөҕө диэри хотону тутуу боломуочуйата муниципалитеттарга бэрилиннэ

Бу сылтан муниципальнай оройуоннарга уонна куораттааҕы уокуруктарга 100 төбөҕө хотону уонна дьоҕус тыа хаһаайыстыбатын эбийиэктэрин тутуутун боломуочуйата бэрилиннэ. Урут маннык үлэлэр Тыа хаһаайыстыбатын министиэристибэтинэн ыытыллаллара.

Биэдэмистибэҕэ олохтоох дьон кыһалҕаларын быһаарыыга саҥа кыахтар арыллаллар.

Санаттахха блогер, пиэрмэр Масаха Мэхээс муус устар 27 күнүгэр быһа лииньийэ кэмигэр ураты этиилээх Айсен Николаевка тахсыбыта. Кини нэһилиэктэринэн саҥа бырагыраама оҥорон, аҕам саастаахтарга сүөһү иитиитинэн дьарыктаныан баҕалаахтарга сүөһүнү арендаҕа биэрэргэ, ону тэҥэ атыылыырга көмө оҥоророрго, ону таһынан аныгы уонна хаачыстыбалаах хотоннору тутуу кыаҕын көрөргө этии киллэрбитэ.

Тыа хаһаайыстыбатын министиэристибэтигэр миниистир таһымыгар пиэрмэргэ исписэлиистэри кытта көрсөн туруорсар боппуруостарын дьүүллэһэригэр этии киллэрбиттэрэ.

Билигин Саха сиригэр «Развитие сельского хозяйства и регулирование рынков сельскохозяйственной продукции, сырья и продовольствия» судаарыстыбаннай бырагыраама ылыныллан үлэлиир, ол чэрчитинэн тыа хаһаайыстыбатын табаары оҥорооччулары өйөөһүҥҥэ судаарыстыбаннай өйөбүл оҥоһуллар.
Бырагыраама биир соругунан тыа хаһаайыстыбатын бородууксуйатын оҥорон таһаарыытын үрдэтиитэ, тыа хаһаайыстыбатын кээпэрэтииптэрин уонна бааһынай (пиэрмэр) хаһаайыстыбаларын бородууксуйаларын кээмэйин улаатыннарыыта буолар.

Бу соругу быһаарарга аадырыстаах дьаһаллар көрүллэллэр, олор ортолоругар сүөһү иитэр комплекстары тутуу. Ол курдук, 2025 сылга сүөһү иитэр комплекстарын тутууга уонна саҥардыыга 454 мөл. солк. үп-харчы көрүллүбүт. «Агростартап» федеральнай бырайыагынан кыттан хаһаайыстыбаны тэриниигэ 8 мөл. солк. диэри үп-харчы бэриллэр. Саҥа тыа хаһаайыстыбатын оҥорон таһаарааччыларыгар «Школа фермеров» үлэлиир.