Өрөспүүбүлүкэҕэ 110 тыһыынчаттан тахса Георгиевскай лиэнтэни тарҕаттылар

Бу сыл муус устар 24 күнүттэн ыам ыйын 9 күнүгэр диэри Кыайыы Волонтердара Саха сирин бары муннуктарынан Георгиевскай лиэнтэни маассабайдык тарҕаталлар.

Дьокуускайга уонна Саха сирин оройуоннарыгар 110 тыһыынчаттан тахса лиэнтэни биэрдилэр. Бу туһунан «Якутия 24» телеханаалга «Актуальное интервью» биэриигэ ыам ыйын 7 күнүгэр СӨ Ыччат дьыалаларыгар уонна социальнай коммуникацияларга миниистирин солбуйааччы Андрей Сосновскай иһитиннэрдэ.

«Кыайыы волонтердара Георгиевскай лиэнтэни көхтөөхтүк түҥэтэллэр. Бары кэриэтэ лиэнтэни туттулар. Быйыл барыта 110 тыһыынчаттан тахса лиэнтэни тарҕаттылар. Саха сирин оройуоннарынан эмиэ болҕомтобутун уурабыт», — диэтэ Андрей Сосновскай.

Кыайыы лиэнтэтин сэргэ волонтердар Сэбиэскэй норуот хорсун быһыыларын суолтатын кэпсиир өйдөбүнньүктэри тарҕаталлар.

Санатан эттэххэ, быйыл аахсый Аҕа дойду Улуу сэриитигэр Кыайыы 80 сылыгар ананар. Георгиевская лиэнтэ — Дьоруойдарга киэн туттуу уонна ытыктабыл бэлиэтэ.

Дьокуускайга «Георгиевская лиэнтэ» аахсыйа киин болуоссаттарынан ыытыллар: Кыайыы, Орджоникидзе, Норуоттар доҕордоһуулара болуоссаттарыгар. Аахсыйаҕа Саха сирин үрдүнэн 500 волонтер кытынна. «Георгиевскай лиэнтэ» аахсыйаны тэрийээччи «Кыайыы Волонтердара» Бүтүн Арассыыйатааҕы уопсастыбаннай хамсааһын.