Саха сиригэр 1,2 млрд солкуобайтан тахса биир кэлим босуобуйа ыытылынна

Саха сиригэр биир кэлим босуобуйаҕа элбэх киһи сайабылыанньа биэрэр. Биир кэлим босуобуйа олоххо киириэҕиттэн, кулун тутар 24 күнүнээҕи дааннайынан, өрөспүүбүлүкэҕэ судаарыстыбаннай көмө 48 010 оҕоҕо уонна 2175 хат дьахтарга ананна.

РФ Социальнай пуондатын Саха сиринээҕи салаатынан өрөспүүбүлүкэҕэ биир кэлим босуобуйаҕа 1 млрд 267 мөл. солк. ыытылынна. Ол туһунан кулун тутар 28 күнүгэр РФ Социальнай пуондатын Саха сиринээҕи салаатын салайааччытын солбуйааччы Марк Унаров брифиҥҥэ иһитиннэрдэ.

Марк Унаров бэлиэтээбитинэн, контакт-кииҥҥэ сүрүннээн биир кэлим босуобуйа төлөбүрүн болдьоҕун туһунан боппуруос киирэр.

«Санатан этэр буоллахха, биир кэлим босуобуйаны аныыр туһунан быһаарыы сайабылыанньа уонна онно сөптөөх ирдэнэр докумуоннар киирбит күннэриттэн 10 үлэ күнүн иһигэр ылыллар. Оттон бастакы төлөбүр босуобуйаны аныыр туһунан быһаарыы ылыллыбытын кэннэ, биэс күн иһигэр оҥоһуллар. Ол кэнниттэн салгыы 3-с чыыһылаттан 25-кэ диэри ыйдааҕы төлөбүр кэлэр ыйга түһүө. Ол курдук, кулун тутардааҕы босуобуйа муус устарга киириэ», – диэн Марк Унаров быһаарда.

РФ Социальнай пуондатын Саха сиринээҕи салаатын Колл-киинигэр ийэ (дьиэ кэргэн) хапытаалын туһунан элбэх ыйытыы киирэр. Марк Унаров эппитинэн, кулун тутарга уонна муус устарга төлөбүр бэрээдэк быһыытынан бириэмэтигэр төлөнүө. «Бэс ыйыгар төлөбүр оҥоһуллар биир кэлим күнүгэр автомат быһыытынан барыта оҥоһуллуо. Ол курдук ийэ (дьиэ кэргэн) хапытаалыттан ыйдааҕы төлөбүр, холобур, ыам ыйынааҕы бэс ыйын 5 күнүгэр түһүөҕэ. Итинник бэрээдэгинэн, бэс ыйынааҕы – от ыйын 5 күнүгэр, от ыйынааҕы – атырдьах ыйын 5 күнүгэр, оннук салгыы баран иһиэ», – РФ Социальнай пуондатын Саха сиринээҕи салаатын салайааччытын солбуйааччы Марк Унаров итинник быһаарда.

СӨ Ил Дарханын уонна Бырабыыталыстыбатын пресс-сулууспата.