Саха сиригэр 1,2 тыһ. тахса устудьуон анал истипиэндьийэни ылар

Саха сиригэр устудьуоннарга – байыаннай дьайыы кыттыылаахтарыгар уонна кинилэр дьиэ кэргэттэригэр 1248 анал истипиэндьийэ бэриллэр диэн брифинг кэмигэр үөрэх уонна билим миниистирин солбуйааччы, өйөбүл миэрэлэрин олоххо киллэрии ыстаабын салайааччытын солбуйааччы Виктория Захарова иһитиннэрдэ.

Спикер этэринэн, орто үөрэххэ 732 киһи, үрдүк үөрэххэ 516 киһи тустаах истипиэндьийэни ылар.

Олорор сирдэриттэн чугас уһуйааҥҥа көһөрүү быраабынан 62 оҕо туһаммыт. Суукканы эргиччи үлэлиир уһуйааҥҥа 8 оҕо киирбит. Уһуйааҥҥа сылдьар  2310 оҕо төрөппүтэ төлөбүртэн босхоломмут.

Виктория Захарова этэринэн, 72 оҕо олорор сирдэриттэн чугас оскуолаҕа көспүт. Итии аһылыгынан 3964 үөрэнээччи хааччыллар. Продленай бөлөххө 568 оҕо сылдьар, кинилэр төрөппүттэрэ төлөбүртэн босхоломмуттар. Эбии үөрэхтээһин дьарыгар 3280 оҕо хабыллар.

Ону тэҥэ, анал байыаннай дьайыы кыттыылааҕын уонна кинилэр дьиэ кэргэттэрин чилиэннэрин кытта үрдүк, орто үөрэххэ өрөспүүбүлүкэ бүддьүөтүн суотугар үөрэниигэ тус сыаллаах 38 сөбүлэҥ түһэрсиллибит.

Анал байыаннай дьайыы кыттыылаахтарын уонна кинилэр дьиэ кэргэттэрин өйүүр миэрэлэр туһунан ыйытыылаах буоллаххытына Үөрэх уонна билим министиэристибэтигэр 506-989 төлөпүөннүөххүтүн сөп.

Бу туһунан Ил Дархан уонна Бырабыыталыстыба пресс-сулууспата иһитиннэрэр.