Саха сиригэр 1390 сайыҥҥы сынньалаҥ путевката байыастар оҕолоругар ананна

Өрөспүүбүлүкэҕэ оҕо сайыҥҥы сынньалаҥын тэрийиигэ барыта 11 тыһыынча сайаапка киирбититтэн, 1390 путевканы байыаннай дьайыы кыттыылаахтарын оҕолоругар ананна диэн үөрэх, билим миниистирэ Ирина Любимова иһитиннэрдэ.

Кини эппитинэн, Ил Дархан ыйааҕын толорон, тыһыынчаттан тахса байыаннай дьайыы кыттыылаахтарын оҕолоро уһуйаан төлөбүрүттэн босхоломмуттар. 5-11 кылаастарга 1,2 тыһыынча оҕо оскуолаҕа босхо аһылыгынан хааччыллыбыт.

Ону тэҥэ, 130 оҕоҕо тус сыаллаах үөрэххэ дуогабар түһэрсиллибит. Орто уонна үрдүк үөрэх кыһаларыгар үөрэнэр 368 устудьуоҥҥа үрдэтиллибит истипиэндьийэ төлөнөр.

Урутаан идэҕэ бэлэмнээһин киинигэр (ЦОПП) «Цифровой куратор», «Графический дизайнер», «Вожатый» хайысхаларга байыастар уонна кинилэр дьиэ кэргэттэрэ босхо үөрэнэллэр диэн СИА суруйар.