Саха сиригэр 1,5 тыһ. киһи алимены төлүүртэн куотунар «хара испииһэккэ» киллэрилиннэ

Саха сиринээҕи Суут бириистэптэрин управлениетын дааннайынан, билиҥҥи туругунан Саха сирин 1528 олохтооҕо алимеҥҥа иэстээхтэр реестригэр киллэриллибит.

Санатан эттэххэ, реестргэ административнай уонна холуобунай эппиэтинэскэ тардыллыбыт эбэтэр  көрдөбүлгэ сылдьар алимеҥҥа иэстээхтэр киирэллэр. Бу туһунан Саха сиринээҕи Суут бириистэптэрин управлениетын пресс-сулууспата иһитиннэрэр.

Суут бириистэптэрин управлениетын автоматизированнай систиэмэтин сибидиэнньэтинэн, бу реестргэ киирбит иэстээхтэртэн саамай саастаахтарынан, сотору кэминэн сокуоннай саастарын туолар икки уолугар көрдөбүлгэ сылдьар 66 саастаах ыал аҕата буолар.

Оттон иэстээхтэртэн саамай эдэрдэринэн 6 саастаах кыыһыгар уонна 4 саастаах уолугар 800 тыһ. солк. тахса  иэстэммит 21 саастаах ийэ буолар.