Саха сиригэр 2 тыһыынчаттан тахса санрейсинэн ыарахан туруктаах ыарыһахтары аҕаллылар  

Ыксаллаах быһыы мэдиссиинэтин өрөспүүбүлүкэтээҕи киинэ 2024 сылга 3195 ыараханнык ыалдьыбыт киһини аҕалыыга 2128 санитарнай сорудаҕы толорбутун туһунан Саха сирин Доруобуйаҕа харыстабылын министиэристибэтэ иһитиннэрэр.

Биэдэмистибэ чахчытынан, быйыл 2023 сылы кытта тэҥнээтэххэ 42-тэн элбэх санрейс оҥоһуллубут. Быыһаммыт, аҕалыллыбыт киһи ахсаана 64 киһинэн эбиллибит.

Туһааннаах мэдиссиинэ киинэ авиация күүһүнэн санитарнай  көмөнү суукканы эргиччи оҥорор. 2024 сылга оройуоннартан Дьокуускайга 1368 ыарыһаҕы аҕаллылар. Санрейстэр араас суһал түгэннэргэ уонна эчэйиилэргэ толоруллаллар. Былырыын хаан эргиирин систиэмэтэ кэһиллибит ыарыылаахтарга 1370 киһини эвакуациялаабыттар. Ону тэҥэ эчэйбит, уокка сиэппит, үлүйбүт 577 киһини тиэйэн аҕалбыттар.

Федеральнай уонна өрөспүүбүлүкэтээҕи бүддьүөттэн үбүлээһин улааппытын түмүгэр санитарнай авиация биллэрдик сайынна. Кэнники сылларга бу хайысхаҕа үбүлээһин улаатан, 2024 сылга 1,9 млрд солк. таҕыста.

Санаттахха, суһал мэдиссинискэй эвакуацияны санитарнай авиация толорор. Кинилэр Дьокуускайга уонна 7 филиалга баазалаахтар: Орто Халымаҕа, Баатаҕайга, Ньурбаҕа, Миринэйгэ, Тиксиигэ, Нерюнгригэ уонна Ленскэйгэ.  Санитарнай авиация үлэтигэр 5 сөмөлүөтү уонна 17 бөртөлүөтү туһаналлар. Бу тиэхиньикэлэр суһал көмөнү оҥорорго аныгы мэдисиинискэй модуллаахтар.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата