Саха сиригэр 2022 сыл түмүгүнэн баһаары утары охсуһууга бастыҥ үлэлээх муниципалитеттары биһириэхтэрэ

Саха сиригэр баһаары утары охсуһууга бастыҥ түмүктэри ситиспит муниципальнай тэриллиилэри биһириэхтэрэ. Быйыл кинилэр ойуур баһаарын умулларар саҥа тиэхиньикэни эбэтэр өрөспүүбүлүкэ бүддьүөтүттэн дотацияны ылыахтара. Бу туһунан ойууру баһаартан харыстааһыҥҥа суһал ыстаап бастакы мунньаҕар бырабыыталыстыба бэрэссэдээтэлин солбуйааччы Дмитрий Садовников иһитиннэрдэ.

Садовников Абый, Анаабыр, Бүлүү, Горнай, Ленскэй, Мэҥэ Хаҥалас оройуоннара ойуур баһаарын утары охсуһууга үчүгэй түмүгү ситиспиттэрин бэлиэтээтэ. Өрөспүүбүлүкэ баһылыгын Айсен Николаев сорудаҕынан билигин бырабыыталыстыба кинилэри биһирээһин боппуруоһун торумнуур.

“Былырыыҥҥы баһаары утары сезоҥҥа ойуурга уот туруутун 3 төгүл, оттон уот салаан ааспыт иэнин – 14 төгүл кыччаттылар. Бу үтүө түмүк уонна барыбыт уопсай өҥөбүт. Бастыҥ көрдөрүүлээх муниципальнай тэриллиилэр бааллар. Кинилэр уот турар кэмигэр үчүгэйдик бэлэмнэммиттэрэ, бары сэрэтэр миэрэлэри ылыммыттара, түргэнник дьаһанан уот тэнийиитин таһаарбатылар. Холобура, Горнай оройуонугар 2021 сылга улаханнык умайыы бэлиэтэммитэ, былырыын 10 гектар ойуурга эрэ уот турбута. Оттон Бүлүү оройуонугар 150 гектарга уот сиэбит буоллаҕына, ыаллыы оройуоннарга сыыппара хас эмэ төгүл улахан. Бастыҥ быраактыка салҕаныахтаах”, — диэтэ кини.

Ыстаап бастакы мунньаҕар Дмитрий Садовников салаа биэдэмистибэлэр уонна муниципальнай тэрээһиннэр кэлэр сезоҥҥа бэлэмнэниилэригэр соругу туруорда.

“Биллэн турар, биһиги балаһыанньа салгыы тупсарыгар баҕарабыт. Былаан үгүс. Быйыл ойууру баһаартан харыстыыр тэрээһиннэри үбүлээһин 2022 сыл таһымынан хаалыаҕа. 1,6 млрд тахса солкуобай федеральнай бүддьүөккэ, 900 мөл солк. тахса – өрөспүүбүлүкэ бүддьүөтүгэр көрүллүбүтэ”, — диэтэ бастакы вице-премьер.

СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ этэринэн, федеральнай бүддьүөт үбэ авиациянан уонна сиринэн кэтээн көрүүгэ туһаныллыаҕа, балар маршруттара сыл бастакы кыбаарталыгар бигэргэниэхтэрэ. Оттон эрэгийиэн үбэ – үлэһиттэргэ хамнастарын төлөөһүҥҥэ уонна материальнай-тэхиньиичэскэй баазаны тупсарыыга ананар.

Ол курдук, 233 км баһаары утары саҥа минерализованнай балаһа оҥоһуллуоҕа, 1228 км минерализованнай балаһа ыраастаныаҕа, 6,6 тыһ гектар сиргэ умайыан сөптөөх матырыйааллары хонтуруоллаан, сэрэтэн уматыы ыытыллыаҕа.

Искусственнай сөҥүүнү түһэрии быраактыката салҕаныаҕа. Бу сыалга 80 мөл солк. бэриллиэҕэ. Аны сайын Саха сиригэр “Полярные авиалинии” авиахамапаанньа баазатыгар бэйэбит зондировщик-сөмөлүөттээх буолуохпут.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Хаартыскаҕа Мария Васильева (СИА) түһэриитэ