Саха сиригэр 2025 сылга тыа хаһаайыстыбатын өйөөһүн кээмэйин оннунан хаалларыахтара

Саха сирин салалтата 2025 сылга тыа хаһаайыстыбатын өйөөһүҥҥэ үбүлээһин кээмэйин быйылгы сыллааҕы таһымнаах хаалларар санаалаахтар.

2024 сылга тыа хаһаайыстыбатын сайыннарыы бырагырааматын үбүлээһинэ 15,7 млрд солк. тэҥнэһэр. Өрөспүүбүлүкэ 2025 сыллааҕы уонна 2026-2027 сс. былааннаах кэмҥэ бүддьүөтүн барыла  бу сыл алтынньы 22-23 күннэригэр Ил Түмэн пленарнай мунньаҕар көрүллүөҕэ. Кэлэр мунньах иннинэ Ил Дархан Айсен Николаев Ил Түмэн сис кэмитиэттэрин  бэрэссэдээтэллэрин кытта көрүстэ.

«Кэлэр сыл бүддьүөтэ кэнники сыллары кытта тэҥнээтэххэ судургута суох буолуо. Үгүс хайысхаларынан, чуолаан тыа хаһаайыстыбатынан, боппуруостар бааллар. Төһө да  ыарахаттар баалларын иһин, тыа хаһаайыстыбатын өйөөһүҥҥэ үбү-харчыны аҕыйатыыны таһаарыа суохтаахпыт. Саха сирин Бырабыыталыстыбатыгар бу боппуруоһу бүддьүөт иккис ааҕыытыгар  үлэлэһэргэ сорудахтаатым»,-диэн Айсен Николаев ТГ-ханаалыгар суруйар.

Саха сирин бүддьүөтэ социальнай хайысхалаах буоларын тутуһар. Бүддьүөт  ороскуотун аҥаарын социальнай-култуурунай эйгэ сайдыытыгар ыытарга былаанныыллар.