Саха сиригэр 2025 сыллааҕы бастакы демо эксэмээннэр саҕаланнылар

Саха сиригэр орто анал үөрэх тэрилтэлэригэр демонстрационнай эксээмэн көрүҥүнэн ыытыллар судаарыстыбаннай түмүктүүр аттестация саҕаланна.

Өрөспүүбүлүкэҕэ бастакынан быраактыкаҕа квалификацияларын Дьокуускайдааҕы тыа хаһаайыстыбатын устудьуоннара бигэргэтиэхтэрэ.  Олунньу 12 күнүгэр диэри демо эксээмэни тиэхиньикум 88 устудьуона алта исписээлинэскэ туттарыаҕа: «бэтэринээрийэ», «зоотехния», «агрономия», «тыа хаһаайыстыбатын тиэхиньикэтин уонна тэрилин туһаныы, өрөмүөннээһин», «сүөһүттэн ылыллар аһылык бородууксуйатын технолгията», «ойуур уонна лесопарковай хаһаайыстыба».  Бэлиэтээн эттэххэ, бу 2022 сылтан саҕаламмыт “Профессионалитет” федеральнай бырайыагы олоххо киллэрии бырагырааматынан бүтэрэр бастакы устудьуоннар буолаллар. Устудьуоннар олунньу бүтүүтэ номнуо дьупулуомнарын ылан, өрөспүүбүлүкэ килииникэлэригэр уонна тыа хаһаайыстыбатын тэрилтэлэригэр үлэлэрин саҕалыахтарын сөп.

Бүгүн ветеринарнай биэлсэр идэтин баһылыахтаах дьоҥҥо ыарыһах быһыытынан кроликтар уонна анал тренажердар бааллар. Устудьуоннар дьиҥнээх үлэҕэ  чугас усулуобуйаҕа 3,5 чаас устата алта муодулу толоруохтаахтар. Ол иһигэр кыылы көрүү-истии, эми биэрии, аһылык боруобатын ылыы, оннооҕор анал тренажерга бааһы тигэн көрүөхтэрэ, саба баайыахтара. Маны барытын үлэ биэрээччилэр бэрэстэбиитэллэрэ кыттыылаах эспиэрдэр кыраҕы кэтэбиллэринэн оҥоруохтара. Бу устудьуоннар билиилэрин уонна ыраактыкаҕа сатабылларын дьиҥнээхтик сыаналыыры хааччыйар. Эксээмэн кэнниттэн кыттааччылар сатабыл пааспарын (паспорт компетенций) ылыахтара, ол түмүгүн үлэ биэрээччилэр киирэн көрөр анал иһитиннэрэр баазаҕа киллэриэхтэрэ.

Санатан эттэххэ, быйыл Саха сиригэр 94 идэҕэ уонна исписэлиинэскэ 300-тэн тахса демо эксээмэни ыытыахтара. Манна 5 тыһ. тахса үөрэҕи бүтэрээччи кыттыаҕа. Бу туһунан СӨ Идэҕэ үөрэтэр кыһалары сайыннарар институт суруйар.