Саха сиригэр 220 улаатан эрэр оҕо «Таежный герой» байыаннай-спортивнай оонньууга кытынна

Бүгүн Дьокуускайга үс күннээх «Таежный герой» диэн өрөспүүбүлүкэтээҕи байыаннай-спортивнай оонньуулар түмүктэнэллэр. Оонньууга 12-17 саастарыгар диэри саастаах 220 оҕо кытынна диэн СӨ Баһылыгын уонна Бырабыыталыстыбатын пресс-сулууспата иһитиннэрэр.

Бу туһунан Аҕа дойдуну көмүскээччилэр дьиэ кэргэттэрин кэмитиэтин Саха сиринээҕи салаатын бэрэссэдээтэлин солбуйааччы Лена Иванова брифиҥҥэ кэпсээтэ.

«Дьокуускай куораттааҕы оҕо киинэ байыаннай-спортивнай оонньуулары ыыппыта 13 сыла буолла. Бу тэрээһини патриотическай иитиигэ тустаах тэрилтэлэр бары өйүүллэр. Оонньуулар билигин ИДьМ бэлэмниир киинин баазатыгар ыытылла тураллар. «Таежные герои» оонньууга Дьокуускайтан, Мэҥэ Хаҥаластан, Горнайтан, Намтан, Хаҥаластан, Уус Алдантан, Чурапчыттан кытта сылдьаллар. Бу оҕолор үгүстэрин аҕалара анал байыаннай дьайыыга кытта сылдьаллар», – диэтэ Лена Иванова.

«Таежные герои» байыаннай-спортивнай оонньуулар ыччат көҕүн үрдэтэргэ, чөл олоҕу тарҕатарга, ыксаллаах быһыыга-майгыга хайдах дьаһанар дьоҕурун үөскэтиигэ сыаллаахтар.