Саха сиригэр 2300-тэн тахса бэйдиэ сылдьар ыты туттулар

Бу сыл саҕаланыаҕыттан Саха сиригэр 2300-тэн тахса  көрүүтэ-харайыыта суох бэйдиэ сылдьар ыты туттулар. Өссө 100-тэн тахса ыты олохтоохтор пууннарга бэйэлэрэ аҕаллылар.

Бу туһунан атырдьах ыйын 13 күнүгэр Бэтэринээрийэ управлениетын пресс-сулууспата иһитиннэрдэ.

Дьокуускайга 1178 бэйдиэ сылдьар ыт тутулунна, бу уопсай ахсааныттан аҥаарын кэриҥэ буолар. Ол кэннэ Нерюнгри улууһа кэлэр, онно 431 ыты туттулар.

Ньурбаҕа – 90, Өлүөхүмэҕэ – 87, Хаҥаласка – 72, Намҥа – 71, Чурапчыга – 61, Аллайыахаҕа – 58. Атын улуустарга бу көрдөрүү 50-тан кыра.

Ыты көрүү-иитии быраабылатын кэспит буруйдаахтарга сыл саҕаланыаҕыттан 452 административнай боротокуол оҥоһулунна. Уопсайа 607 500 солк. суумалаах ыстараап түһэрилиннэ.

Итини таһынан, хаһаайыннаах ыттар доруобуйаҕа оҥорбут эчэйиилэринэн 74 боротокуол толорулунна. Ыстараап суумата 690 000 солкуобай буолла.

Сокуон хараҕынан, хаһаайын ыты көрөр-иитэр быраабылатын бастакы кэһиитин иһин 2000-тан 3000 солкуобайга диэри ыстараап көрүллэр, иккис төгүлүгэр – 4000-тан 5000 солк. диэри. Хаһаайыннаах ыт киһи олоҕор эбэтэр доруобуйатыгар, эбэтэр баайыгар-дуолугар хоромньуну оҥорбут буоллаҕына — ыстараап суумата 10 000-тан 30 000 солкуобайга диэри үрдүүр. Сорох түгэннэргэ холуобунай эппиэтинэс көрүллэр.