Саха сиригэр 24 ойуур баһаара умуруорулунна

Саха сиригэр бүтэһик сууккаҕа 145 тыһ. га иэннээх 24 ойуур баһаара умуруорулунна. Онтон биирэ — ландшафтнай баһаар. Бүгүҥҥү күҥҥэ 20 ойуур баһаарын умуллараллар. Бу туһунан экология министиэристибэтэ иһитиннэрэр.

Ойуур баһаарын Алдан, Амма, Үөһээ Халыма, Муома, Нерюнгри, Өймөкөөн, Өлүөхүмэ, Сунтаар, Орто Халыма уонна Уус Маайа улуустарыгар умуллара сылдьаллар.

Баһаары бохсууга 728 баһаары умулларар дьон, 8 анал тиэхиньикэ уонна 8 Ми-8 бөртөлүөт үлэлиир. Ону таһынан, 18 АН-2 уонна Cessna сөмөлүөт ойуур баһаара буола турар сир иэнин кэтээн көрөр.