Саха сиригэр 25 саастарыгар диэри 148 паара олохторун холбоотулар

СР Үлэҕэ уонна социальнай сайдыыга министиэристибэтин иһитиннэриитинэн, 2024 сыл тохсунньу-олунньу ыйдарыгар Саха сирин 148 эдэр ыала 25 сааһыгар диэри ыал буолан, 50 тыһ. солк. биир кэмнээх харчынан төлөбүрү ыллылар.

—  Кулун тутар 28 күнүнээҕи туругунан, быйылгы сыл бастакы үс ыйыгар Дьокуускайга 119 эдэр паара ыал буоллулар, — диир ЗАГС управлениетын салайааччыта Римма Петровна. Бу туһунан yakutia-daily.ru суруйар.

– Эдэрдэр саастарын туһунан этэр буоллахха, бу көрдөрүү 18- тан 24-гэр диэри халбаҥныыр, ол эбэтэр Дьокуускайга ыччат олохторун холбуур кэмин уһаппаттар, биллэн турар, бу олус үчүгэй. Аны туран судаарыстыба өттүттэн кинилэргэ 50 тыһ.солк. биир кэмнээх харчынан төлөбүр оҥоһуллара үтүө холобурунан буолар. Ону тэҥэ Дьокуускайдааҕы ЗАГС үлэһиттэрэ кэлиҥҥи сылларга киин куоракка элбэх оҕолоох ыаллар ахсааннара элбээн иһэрин бэлиэтииллэр.

Санаттахха, Саха сирэ Уһук Илин уокурукка саамай элбэх оҕолоох дьиэ кэргэннээх ахсаанынан биллэр. Онтон оҕо төрөөһүнүн таһымынан өрөспүүбүлүкэ Уһук Илиҥҥэ бастакы миэстэни уонна дойду үрдүнэн ахсыс миэстэни ылар.