Саха сиригэр 294 устудьуоҥҥа үөрэхтэрин төлөөтүлэр

Тохсунньу 23 күнүнээҕи туругунан, төлөбүрдээх үөрэхтэрин толуйууну элбэх оҕолоох ыаллар оҕолоро — 294 устудьуон ылбыт.

Үбүнэн көмөнү кэскиллээх идэлэргэ үөрэнээччилэргэ оҥороллор. Төлөбүрү ылбыттартан 39,4% иһитиннэрэр ситимҥэ, 29,5% сиэстэрэ дьыалатыгар, физкултуураҕа 10,5 быр., 10,2 % повар үөрэҕэр үөрэнэллэр.

Санатан эттэххэ, өрөспүүбүлүкэ Ил Дарханын Ыйааҕынан 2024 сыл балаҕан ыйын 1 күнүттэн орто анал үөрэххэ төлөбүрдээх киирбиттэргэ 23 диэри саастаахтарга үөрэхтэрин төлөбүрүн сорҕотун төлүүллэр. Кинилэргэ 50 тыһыынча солкуобай кээмэйдээх биир кэлим төлөбүр көрүллэр.

Ону тэҥэ элбэх оҕолоох ыаллары эбии өйүүр миэрэлэр бааллар. Ол курдук, олорор дьиэтин хомунаалынай төлөбүрүгэр 30% чэпчэтии, оскуолаларга уонна профтехучилищеларга үөрэнээччилэргэ босхо аһылык, куорат уонна куорат таһынааҕы оптуобустарга босхо айаннааһын, түмэллэргэ босхо сылдьыы, төрөппүттэргэ эбии үөрэҕи ылалларыгар көмөлөһөллөр.

Ил Дархан Айсен Николаев өрөспүүбүлүкэ парламеныгар Анал этиитигэр төрдүс уонна онтон элбэх оҕолонооччулары өйүүр кэм кэлбитин эппитэ. Кинилэр «Дьиэ кэргэн» өрөспүүбүлүкэтээҕи Ийэ хапытаалын ылыахтара.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата