Саха сиригэр 540-ча лааҕыр үлэлиэҕэ

Үөрэх кэмэ түмүктэнэрэ чугаһаата. Төрөппүттэр сыыйа оҕолорун тугунан дьарыктыыр, ханна, хайдах сынньатар туһунан толкуйдаан эрэллэр. Оҕолоро кылгас сайыны туһалаахтык атааралларыгар, күүс-сэниэ эбинэллэригэр баҕараллар. Быйыл сайын өрөспүүбүлүкэҕэ барыта 500-тэн тахса лааҕыр үлэлиирэ былааннанар.

Аҕыйах хонуктааҕыта оҕо сайыҥҥы сынньалаҥын тэрийии­нэн биэдэмис­тибэлэр икки ардыларынааҕы хамыыһыйа мунньаҕа буолан ааспыта. Күн бүгүн муниципальнай тэриллии­лэр уонна куорат уокуруктара оҕону сынньатыыга, чэбдигирдиигэ быйыл сайын аһыллара былаан­нанар реестрдэри чөкөтөр үлэни ыыта сылдьалларын иһитиннэрбиттэрэ, муус устар 1 күнүгэр диэри чопчуланыахтаах. Былырыын барыта 534 лааҕыр үлэлээбит эбит буол­лаҕына, быйыл 540-тан тахса аһыллыаҕа диэн сабаҕалыыллар. Уонна былырыыҥҥытааҕар өрөспүүбүлүкэ таһыгар, холобур байыаннай дьа­йыы кыттыылаахтарын оҕолоро сынньана барыылара эбиллиэҕэ диэн этиллибитэ.

Маны таһынан, эбии үөрэхтээһин тэрилтэлэрэ күнүнэн аҕыйах чаас оҕолору ыҥыран дьарыктыыллар, эрчи­йэллэр, экскурсиялары ыыталлар. ИДьМ иитинэн араас былаһааккалары тэрийэллэр. Волонтердар хамсааһыннара үлэлииллэр. Бу көрүҥүнэн сыллата барыта 55 тыһ. тахса оҕону хабаллар.

Өрөспүүбүлүкэ тас өттүгэр

Саха сирин тас өттүгэр быйыл, уопсайа, 2000 курдук оҕо доруобуйатын бөҕөргөтүөхтээхтэр. Сорохторо “Артек”, “Океан”, “Орленок” курдук федеральнай кииннэргэ, атыттар Краснодарскай кыраай лааҕырдарыгар сынньана барыахтара. Маны тэҥэ, байыаннай дьайыы кыттыы­лаахтарын оҕолорун Сочи лааҕырдарыгар ыытыахтара.

Саха сирин оҕолоро “Артек”, “Океан” курдук өрөспүүбүлүкэ тас өттүнээҕи лааҕырдарга сылы эргиччи сынньаналлар. Федеральнай лааҕырдарга, кииннэргэ сынньанарга оҕолор чопчу баалы ылбыт буолуохтаахтар. Ол эбэтэр, са­­йаапканы толорорго дойду, өрөспүүбүлүкэ, улуус таһымнаах тэрээһиннэргэ кыттыыга ситиһиилэрин ыйар ирдэнэр. Маныаха хас биирдии кыраамата тус-туспа киритиэрийдэринэн арахсан баал туруоруллар.

Байыаннай дьайыы кыттыылаахтарын оҕолоругар

Байыаннай дьайыыга кыттар дьон дьиэ кэргэнин өйүүр федеральнай даҕа­ны, өрөспүүбүлүкэ да иһи­нээҕи кэккэ миэрэлэр үлэлииллэр. Кинилэр оҕолоро өрөспүү­бүлүкэ тас өттүгэр баар лааҕырдарга сынньаныахтара, туһааннаах ыйаахха аҕыйах хонуктааҕыта Ил Дархан Айсен Николаев илии баттаата.

“Былырыын төрөппүттэр уонна сокуоннай бэрэстэбии­тэллэр оҕолорун өрөспүүбүлүкэ тас өттүгэр сынньатар туһунан баҕа санааларын биллэрбиттэрэ. Бу санаалара учуоттанна” диэн докумуон бырайыагын оҥорбут Үөрэх уонна билим министиэристибэтэ иһитиннэрэр.

“Өрөспүүбүлүкэ үрдүнэн  байыаннай дьайыы кыттыылааҕын, уопсайа, 3 тыһ. оҕотун сынньатар сорук турар. Быйыл сайын 900-чэ оҕо Сочи лааҕырдарыгар сынньаныахтаах. Өрөспүүбүлүкэ судаарыс­тыбаннай лааҕырдарыгар –  “Сосновай Бор”, “Энергетик”, “Дружба” (өрөспүүбүлүкэтээҕи интэринээт-тиэхиньикум иһинэн тэриллиэхтээх) лааҕыр­дарга, “Чэбдик” санаторийга 700-тэн тахса оҕону хабыахтара. Ону таһынан, миэстэтигэр сынньалаҥы, доруобуйаларын бөҕөргөтүүнү тэрийэллэригэр анаан уонтан тахса мөлүйүөн солкуобай үп тыырыллыбыта.

СЫЫППАРАЛАР

540-тан тахса

– сайыҥҥы лааҕыр арыллара сабаҕаланар:

420 – күнүскү лааҕыр

45 – куорат таһынааҕы хонуктаах

45 – үлэ уонна сынньалаҥ лааҕыра

31 – палаточнай

50 тыһ. оҕону хабар былааннанар.

Эрдэ испииһэккэ киирбит түгэннэригэр Үөрэх управлениетыгар эрэ бигэргэтиини ааһаллар. Саҥа суруйтарааччылар Элбэх хайысхалаах кииҥҥэ (МФЦ) тиийэн сайаапкаларын биэрэллэр”, – диэн Ресурснай киин сынньалаҥы, чэбдигирдиини тэрийиигэ салаатын салайааччыта Светлана Васильева быһаарар.

Ити курдук, Саха сирин тас өттүнээҕи, өрөспүүбүлүкэ, улуус, куорат иһинээҕи лааҕыр­дарынан, санаторийдарынан барыларын хабыахтаахтар.

Санатан эттэххэ, былырыын тэрээһиннээх сынньалаҥынан уонна доруобуйаны чэбдигирдиинэн 1823 оҕо туһаммыта, итинтэн судаарыстыбаннай лааҕырдарга – 346 оҕо, муниципальнай лааҕырдарга – 1477.

Арктика оҕолоро

Тыйыс айылҕалаах Арктика оҕолорун номнуо үһүс сылын анаан-минээн Саха сирин тас өттүнээҕи лааҕырдарга ыытан сынньатыы үлэтэ былааннаахтык барар. Арктика оҕолоро “Арктика зоналарын улуус­тарын сайыннарыы” бырагы­рааманан федеральнай субсидия суотугар олорор сирдэриттэн сынньанар сирдэригэр диэри уонна төннөр айаннарын ороскуота олоччу төлөнөр. Онон бу улуустар оҕолоругар бэртээхэй бырагыраама үлэ­лиирин бэлиэтиир оруннаах.

Лааҕыры арыйыы

Кэлин дьон өҥө араас хайысхатын тутуһан, бэйэ­тэ дьыала тэринэн үлэ­лиир түгэнэ элбэх. Оскуола саас­таах оҕолорго аналлаах дьарыктары хото тэрийэр буоллулар. Биирдиилээн да буоллар, лааҕыр арыйан үлэлэтиэн баҕарар дьон баар. Ол эрээри, бу кэккэ ирдэбиллэрдээх, ылбычча үлэлэтэн барар хайдах даҕаны табыллыбат. Реестргэ бары ирдэбилгэ эппиэттиир санитарнай-эпидемиологическай, куттал суох буолуутун хааччы­йар, баһаартан сэрэхтээх буолууга түмүктээх, о.д.а. лааҕырдар хапсаллар.

Светлана Васильева, Ресурснай киин сынньалаҥы, чэбдигирдиини тэрийиигэ салаатын салайааччыта:

– Лааҕыр арылларын туһунан бирикээс номнуо олунньуга ыытыллыбыта. Күнүскү лааҕыры тэрийиигэ сайабылыанньаларын, СЭС түмүгүн олунньу 25 күнүгэр диэри туттарбыттара. Куорат таһынааҕылар, палаточнайдар уонна үлэ, сынньалаҥ лааҕырдара муус устар 15 күнүгэр диэри биэрэллэр. СЭС, баһаарынай, куорат таһынааҕыга куттал суох буолуутун хааччыйыыга, аһылык блогун өттүгэр, мэдиссиинэ көрүүтэ ирдэнэр. Нэһилиэк иһинээҕи лааҕырдары арыйарга, бастатан туран, улуустааҕы үөрэх управлениеларын уонна олохтоох Роспотребнадзору кытта үлэлэһэллэр. Биһиги лааҕыр ахсаана элбиириттэн үөрэбит эрэ. 

Туох докумуон ирдэнэрин, оҕолор сайаапкаларын хайдах суруйаллара, уо.д.а. ыйыылары-кэрдиилэри биһиги Саха отдых детей РФ порталбытыгар көрүөхтэрин сөп. Оҕо сайыҥҥы сынньалаҥын уонна доруобуйатын чэбдигирдиини тэрийии туһунан +7 800-550-14-21 нүөмэринэн ыйыталаһыахтарын сөп.

Хаартыскалар: СИА