Саха сиригэр 7 киһилээх бөһүөлэк баара билиннэ

Томпо оройуонун Развилка бөһүөлэгэр 7 киһи олорор. Кинилэртэн түөрдэ биэнсийэлээхтэр.

Олорор дьиэлэрэ хочуолунайынан оттуллар, дизель станциятынан электроэнергиянан хааччыллар. Бу тэрилтэлэргэ Хаандыгаттан уонна Теплай Ключтан 7 киһи баахта ньыманан тиийэн үлэлииллэр. Оройуон дьаһалтата манна турбаазалары тэрийэр, ЫБММ быыһааччылара тохтуур сирдэринэн оҥорорго былаанныыр.

Санаттахха, Ил Түмэн дьокутаата Виктор Федоров Ил Түмэн пленарнай мунньаҕар кыра нэһилиэнньэлээх учаастактары үбүнэн-харчынан  хааччыйары тохтоторго этии көхтөхпүтэ. Бу күннэргэ дьокутаат Томпо оройуонун Развилка бөһүөлэгэр дьон-сэргэ хайдах олорорун көрөөрү тиийэ сырытта. Бу учаастак Хаандыгаттан 150 км ыраах сытар. Онно 7 киһи олорор, олортон 4-дэ биэнсийэлээх. Кинилэр уһук хоту сир оройуоннарыттан көһөн кэлиэхтэрин уонна кэмпэнсээссийэнэн туһаныахтарын баҕараллар.

— Бу дьону көһөрүүгэ быһа холоон 15 мөл. солк. үп-харчы көрүллэрэ наадалаах. Онуоха сыл ахсын судаарыстыба субсидия быһыытынан бөһүөлэккэ 25-30 мөл. кэриҥэ харчыны ороскуоттуур, — диэн дьокутаат ТГ-ханаалыгар  суруйар. Бөһүөлэк олохтоохторун өйүүр инниттэн 7 киһи баахта ньыманан хочуолунайга уонна дизельстанциятыгар тиийэн үлэлииллэр. Бөһүөлэккэ мобильнай сибээс, интэриниэт баар. Виктор Федоров этэринэн, манна өрүскэ балыктыахха, чуумпу сиргэ олус үчүгэйдик сынньаныахха сөп. Оройуон дьаһалтатыгар парламентарийга иһитиннэрбитинэн, бөһүөлэк сабыллар кыаҕа суох. Манна туристическай кластеры, суол сулууспатын уонна ЫБММ үлэһиттэрин баазатын олохтуур былааннаахтар.