Саха сиригэр 74 тыһыынчаттан тахса оҕо төрөппүтүгэр биир кэлим көмө ананна

Саха сиринээҕи Социальнай пуонда салаата 2025 сыл саҕаланыаҕыттан 74 тыһыынчаттан тахса оҕо төрөппүтүгэр биир кэлим босуобуйаны анаата. Биир кэлим босуобуйаны анааһын сүрүн усулуобуйата ыал дохуотун таһыма буолар. Босуобуйа ыал орто дохуота тиийинэн олоруу алын кээмэйиттэн намыһах буоллаҕына бэриллэр.

Ол аата, ыал уопсай дохуота ааҕыллыбыт кэмигэр кини чилиэннэрин ахсааныгар түҥэтиллэр уонна ылыллыбыт суума олохтоммут боруоктан намыһах буоллаҕына, төлөбүрү ыларга сайабылыанньа биэриэн сөп. 17 сааһыгар диэри оҕолорго эрэгийиэннээҕи оҕо олорор алын кээмэйигэр олоҕуран суоттанар. Эрэгйииэннээҕи тиийинэн олоруу алын кээмэйэ үрдээбитин учуоттаан, биир кэлим босуобуйа кээмэйэ ыал дохуотуттан тутулуктанан уларыйыаҕа:

Бастакы (хотугу) зонаҕа 15195-тэн 30390 солкуобайга диэри;.

Иккис зонаҕа (хотуттан ураты) 12727-тэн 25455 солкуобайга диэри.

Ону таһынан, баай-дуол баарын уонна атын да фактордарынан, холобур, ыалга улахан киһи дьарыга эмиэ учуоттанар. Быйылгы сылга уопсай Арассыыйатааҕы хамнас алын кээмэйэ 22440 солкуобайга тэҥнэһэр. Онон, хас биирдии үлэлиир кыахтаах ыал чилиэнин дохуота, дьарыктаах буолуу көрүҥүттэн тутулуга суох, 12 ый устата 89760 солкуобайтан итэҕэһэ суох буолуохтаах.

Бу быраабыла бэйэ дьарыктаах дьоҥҥо эмиэ сыһыаннаах. Урут бэйэ дьарыктаах киһи дохуот ылар кэмигэр регистрацияламмыт кэмиттэн пропорциональнайдык ый ахсаанынан быһаарыллара.