Саха сиригэр 8 тыһыынчаттан тахса дьиэ бэрэсидьиэн бырагырааматынан гааска холбонно

РФ Бэрэсидьиэнэ Владимир Путин көҕүлээһининэн, социальнай гаастааһын чэрчитинэн 2021 сылтан 8 тыһыынчаттан тахса дьиэ гааска холбонно.

Бу туһунан Айсен Николаев нэһилиэнньэлээх пууннарга гааһы киллэрэр эрэгийиэннээҕи ыстаап мунньаҕар иһитиннэрдэ.

Ил Дархан этэринэн социальнай гаастааһыҥҥа сыллааҕы былаан алтынньыга аһара барбыт.  Уһук Илиҥҥэ 1 миэстэҕэ, дойду үрдүнэн 8 миэстэҕэ тахсыбыт.

Сүрүн ситиһиилэринэн Өлөчөй уонна Харбала-1 сэлиэнньэлэргэ гааһы киллэрии түмүктэммитэ.

Мунньахха чугастааҕы уонна кэлэр сыллааҕы сүрүн соруктары быһаарыстылар.

“Сахатранснефтегаз” АУо генеральнай дириэктэрэ Алексей Колодезников иһитиннэрбитинэн, сыл бүтүөр диэри 375 км гаас ситимин тардыы былааннанар.

Кэлэр сыллааҕы былааҥҥа – 1082 дьиэни гаастааһын, 69 км гаас ситимин уонна 130 тарҕатардаах ситими тутуу былааннанар.

Саха сирин соҕуруу өттүн гаастааһын салҕанар, манна 2025 сылга 19 нэһилиэнньэлээх пууҥҥа 167 км тарҕатардаах газопроводы тутуу былааннанар, диэн иһитиннэрэр Ил Дархан, бырабыыталыстыба пресс-сулууспата.