Саха сиригэр 80 сааска диэри үйэлэниигэ сорук туруордулар

2030 сылга саха дьонун орто саастара 80 тэҥнэһиэн наадатын туһунан соругу  Ил Дархан Айсен Николаев Ил Түмэҥҥэ туһаайан анал этиитигэр иһитиннэрбитэ. Өрөспүүбүлүкэ аҕа баһылыга аҕам саастаах көлүөнэни дьиэ кэргэн үтүө үгэстэрин үйэтитээччинэн ааттаата уонна кинилэр үйэлэрин уһатыы суолталааҕын бэлиэтээтэ.

«Саха сирин олохтоохторун көхтөөх, чөл туруктара — өссө биир сүрүн соругу ситиһии буолар. 2030 сылга өрөспүүбүлүкэ олохтоохторун орто саастара 80 сааска тэҥнэһиэҕэ», — диэн эттэ.

Кини бэлиэтииринэн, «Демография» национальнай бырайыак чэрчитинэн, судаарыстыба эпиэкэтигэр олорор  аҕам саастаах дьон олорор усулуобуйалара биллэ тупсубут. Томмокко, Бүлүүгэ, Өлүөхүмэҕэ, Намҥа аныгы интэринээт-дьиэлэр куорпустара үлэҕэ киирбитэ, ону сэргэ Мэҥэ Хаҥалас Матта  нэһилиэгэр интэринээт тутулла турар.

«Үйэ саас» бочуоттаах бэлиэ туһунан эппитэ, ол курдук балаҕан ыйыгар быһа эпииргэ 100 сааһын туолбут аҕам саастаахтарга төлөбүр уон төгүл үрдээн 1 мөл.солкуобайга үрдүүрүн иһитиннэрбитэ. Маны сэргэ, Айсен Николаев дьиэ кэргэн уонна демография бэлиитикэтигэр үчүгэй көрдөрүүлээх улуустары  10 мөл. солкуобайга тиийэ наҕараадалааһын быраактыкатын киллэриини иһитиннэрбитэ. Бу сылга кыайыылааҕынан Горнай оройуона буолбута. Ил Дархан анал этиитигэр Горнай улууһун Маҕарас нэһилиэгин олохтоохторо Винокуровтар дьиэ кэргэн  кэлбиттэрэ.

«Айталина Никитична уонна Александр Николаевич истиҥ сыһыаҥҥа уонна тапталга бигээн аҕыс оҕону улаатыннараллар. Балар истэригэр иитимньи оҕолор эмиэ бааллар. Кинилэр бары биир эйэлээх, бөҕө туруктаах дьиэ кэргэн буолаллар.  Бу дьиэ кэргэн бар дьоҥҥо үтүө холобур буоллун», — диэтэ.